Eigiendur víkingaskips, sem notað var við tökur á stórmyndinni The Odyssey, segja farir sínar ekki sléttar í samskiptum við kvikmyndaverið Universal sem framleiðir myndina. Skipið skemmdist töluvert við tökurnar samkvæmt eigendunum, þar á meðal á skut og mastri, og kvikmyndaverið hefur ekki greitt fyrir tjónið.
Segja kvikmyndaverið hafa heitið að borga allan kostnað
Víkingaskipið Glad av Gillberga er eftirlíking af Skuldelev 5, skipi frá 1050 sem fannst í Hróarskeldufirði á sjöunda áratug síðustu aldar. Það er í eigu Vikingaleden, samtaka í Vermalandi í vesturhluta Svíþjóðar.
Skipið var byggt á árunum 1995 til 1998 og hefur siglt um Norðursjó, Eystrasaltið og alla leið til Kanada.
Universal leigði skipið í hálft ár meðan tökur á stórmynd leikstjórans Christophers Nolans, The Odyssey, stóðu yfir. Kvikmyndin er byggð á Ódysseifskviðu Hómers og fjallar um Ódysseif sem barðist í Trójustríðinu og ævintýri hans á langri heimleið til eiginkonu sinnar og sonar eftir að stríðinu er lokið.
Eigendur skipsins segja kvikmyndaverið hafa heitið því að borga allan kostnað við viðgerðir á skipinu eftir tökurnar. Vikingaleden segist hafa sent Universal reikning fyrir efninu sem var notað við viðgerðirnar en segist ekki hafa rukkað fyrir sjálfboðaliðavinnuna. Engin greiðsla hafi borist.
Viðgerðarkostnaður aðeins brot af því sem kvikmyndin þénaði
Kvikmyndin var frumsýnd 17. júlí og halaði inn 264 milljónum bandaríkjadali um frumsýningarhelgina. Viðgerðirnar við skipið voru metnar á sex þúsundi bandaríkjadali, jafnvirði 770 þúsund íslenskra króna.
Peter Olausson, formaður Vikingaleden, segir ekkert óvenjulegt að skipið hafi skemmst við tökurnar, það þýði einfaldlega að það hafi verið mikið notað.
„En það þarf að laga það. Okkur var lofað bótum fyrir að gera við skipið, að því gefnu að þeir sendu okkur peningana sem þurfti til efniskaupa.“
Upphæðin sem þurfi til að borga fyrir viðgerðirnar, olíu og önnur efni, sé aðeins dropi í hafið fyrir kvikmyndaverið. „Ég tel að þeir ættu að borga okkur.“
