Maskína gerði stóra skoðanakönnun fyrir DV þar sem 1.856 kjósendur svöruðu, vel dreifðir um landið og milli aldurshópa. Fleiri sögðu JÁ í öllum aldurshópum nema 70 ára og eldri. Könnunin var gerð 2. til 11. júní þannig að hún sýnir hug þeirra sem tóku þátt einmitt núna. Þetta er fyrsta skoðanakönnunin sem er birt eftir að Alþingi samþykkti þjóðaratkvæðagreiðslu þann 29. ágúst nk. DV birti könnunina kl 9:00 í morgun.
Orðið á götunni er að þessi niðurstaða sæti tíðindum vegna þess að andstæðingar hafa verið mun fyrirferðarmeiri í umræðunni en JÁ-fólkið og áttu því flestir von á að mæling núna yrði þveröfug. Þetta sýnir að málflutningur og málstaður nei-liðanna er ekki að virka, allavega ekki eins og staðan er núna. Þeir hafa komið fram með talsverðum hávaða og beitt grímulausum hræðsluáróðri, upphrópunum og jafnvel gömlum og úreltum fimmaurabröndurum. Nei-liðar hafa vikið sér undan málefnalegri umræðu og staglast á ósannindum sem margbúið er að leiðrétta án þess að þeir taki mark á því.
Þá er óhætt að halda því fram að þeir sem hafa verið fyrirferðarmestir í neikvæðri umræðu einangrunarsinnana séu ekki að ná til fólks. Marga grunaði að helstu talsmenn nei-liða næðu ekki eyrum kjósenda sem vilja móta sína stefnu en ekki láta segja sér fyrir verkum. Meðal þeirra sem hafa verið hvað háværastir síðustu vikur og mánuði eru Sigríður Andersen, Guðlaugur Þór Þórðarson og Sigmundur Davíð Gunnlaugsson í þinginu, Haraldur Ólafsson formaður Heimsýnar, sem er áhugamannafélag um einangrun Íslands, Guðni Ágústsson sem sagði opinberlega að verið væri að nauðga fjallkonunni, Björn Bjarnason, Erna Bjarnadóttir fyrrum starfsmaður Mjólkursamsölunnar, Hjörleifur Guttormsson, Hannes Hólmsteinn Gissurarson, Hjörtur Guðmundsson sem mun hafa birt sömu greinina 60 sinnu með mismunandi fyrirsögnum, Morgunblaðið og hjáleiga þess Viðskiptablaðið. Þá eru ótaldir allmargir hægrisinnaðir hlaðvarpsþættir.
Orðið á götunni er að hamagangur framantaldra aðila hafi einfaldlega ekki virkað eins og þessi stóra og nýja skoðanakönnun Maskínu fyrir DV sýnir.
Þá hefur það einnig vakið mikla athygli hve neikvæð samtök atvinnurekenda virðast vera í umræðunni um þjóðaratkvæðagreiðsluna. Vitað er um fjölda atvinnurekenda og fjárfesta sem vilja að gengið verði til samninga til að fá úr því skorið í eitt skipti fyrir öll hvaða möguleikar bjóðast Íslendingum í aðildarsamningi við Evrópusambandið. Mörgum er einnig umhugað um að Íslendingar eigi kost á að taka upp evru en þurfi ekki að treysta á þann eina kost til framtíðar sem við höfum mátt búa við, íslenska krónu, dvergmynt sem blaktir eins og lauf í vindi ef eitthvað bjátar í heimsbúskapnum. Samtök í atvinnulífinu, flest hver, virðast nú lúta stjórn hinna neikvæðu ef marka má stanslausar árásir þeirra á allt sem kemur frá ríkisstjórninni.
Margir sægreifar – þó alls ekki allir – og mörg önnur stærri fyrirtæki fara ekki dult með andúð sína gagnvart þjóðaratkvæðagreiðslu og Evrópusambandinu. Forsvarsmenn margra minni atvinnufyrirtækja óttast þá og vilja ekki reita þá til reiði til að missa ekki viðskipti. En við erum öll ein í kjörklefanum og þessi nýja skoðanakönnun sýnir að kjósendur ætla ekki að láta segja sér fyrir verkum.
Orðið á götunni er að sumarið fram undan verði líflegt í stjórnmálaumræðu á Íslandi og úrslit þjóðaratkvæðagreiðslunnar í lok ágúst verða söguleg – hver sem niðurstaðan verður.
