Þrír karlmenn hafa verið dæmdir í skilorðsbundið fangelsi fyrir að kveikja í Teslu-bifreið lögreglukonu í Reykjavík í ágúst 2023. Einn þeirra átti að fá 100 þúsund krónur fyrir verkið. Annar sagði fyrir dómi að sá hefði átt að fá greitt frá „mafíunni“.
Héraðsdómur Reykjavíkur kvað upp dóminn 27. október. Tveir mannanna fengu átta mánaða fangelsi og einn sex mánaða. Refsingarnar eru skilorðsbundnar til þriggja ára. Þeir voru sakfelldir fyrir stórfelld eignaspjöll og er brotið fært undir 2. málsgrein 257. greinar almennra hegningarlaga, samkvæmt dómnum í máli S-793/2026. RÚV fjallaði um dóminn í dag.
„Mafían“ og 100 þúsund krónur
Í dómnum kemur fram að einn mannanna hafi fengið vilyrði fyrir 100 þúsund króna greiðslu fyrir að kveikja í bílnum. Dómurinn taldi hafið yfir skynsamlegan vafa að hann hefði átt að fá féð.
Sá sem dómurinn telur hafa lagt eld að bílnum bar fyrir dómi að hann sjálfur hefði engar greiðslur átt að fá. Hinn hefði átt að fá greitt frá „mafíunni“. Þetta eru orð hans sjálfs, og dómurinn skýrir ekki hvað átt er við með þeim. Hjá lögreglu hafði hann sagt að hann vissi aðeins að um væri að ræða hættulegt fólk í klíku sem tengdist glæpastarfsemi.
Mennirnir neituðu allir sök. Samkvæmt dómnum báru tveir þeirra hjá lögreglu að þeim hefði verið hótað. Annar sagði að fjölskyldumeðlimir hans yrðu drepnir ef hann kveikti ekki í bílnum. Framburður eins sakborningsins fyrir dómi var að mati dómsins afar ótrúverðugur, en hann var allt annar en hjá lögreglu.
Tvær tilraunir sömu nóttina
Kveikt var í bílnum fimmtudaginn 17. ágúst 2023. Hann var af gerðinni Tesla Model 3, árgerð 2020, metinn á um 5,1 milljón króna, og stóð mannlaus utandyra í Reykjavík. Tilkynning barst um eld í bílnum um klukkan 7:30 um morguninn og eyðilagðist bíllinn.
Dómurinn telur sannað að einn mannanna hafi skipulagt og undirbúið verkið. Hann fékk annan mann til verksins, þann sem átti að fá 100 þúsund krónurnar. Sá reyndi fyrr um nóttina að kveikja í bílnum með bensíni en það tókst ekki. Um morguninn kom hann aftur á vettvang með þriðja manninum, og samkvæmt dómnum var það sá þriðji sem lagði eld að bílnum á meðan hinn beið.
Bensín og leifar af bensíni fundust í skóm tveggja mannanna. Dómurinn byggir einnig á símagögnum, myndum úr eftirlitsmyndavélum á bensínstöð og framburði vitnis sem sá tvo menn á rafhlaupahjóli við bílinn.
Hefnd, en ekki sannað að þeir vissu hver átti bílinn
Annar eigandi bílsins var rannsóknarlögreglukona í fíkniefnadeild lögreglunnar á höfuðborgarsvæðinu þegar íkveikjan var framin. Hún sagði lögreglu á vettvangi að hana grunaði ákveðna menn um að tengjast íkveikjunni og að einn þeirra hefði hótað henni vegna vinnu hennar. Málið var því lengi rannsakað sem brot gegn valdstjórninni. Fyrir dómi sagði hún að sá sem hefði hótað henni væri ekki ákærður í málinu.
Ákært var fyrir eignaspjöll en ekki brot gegn valdstjórninni. Dómurinn taldi ekki sýnt fram á að mennirnir þrír hefðu vitað að lögreglumaður ætti bílinn. Hins vegar segir dómurinn að þeim hafi öllum verið kunnugt um að íkveikjan væri hefnd, og að það horfi til refsiþyngingar ásamt miklu tjóni. Til refsimildunar var litið til þess að umtalsverðar tafir urðu á málinu. Sá sem skipulagði verkið var aðeins 18 ára þegar brotið var framið, og var það haft til hliðsjónar við refsiákvörðun hans.
Einn mannanna fór úr landi áður en aðalmeðferð hófst. Hann kom fyrir dóminn við þingfestingu og lýsti sig saklausan, en mætti ekki til aðalmeðferðarinnar. Ákæruvaldið reyndi að hafa uppi á honum án árangurs, og var málið dæmt án þess að hann gæfi skýrslu fyrir dómi.
RÚV greinir einnig frá því að einn mannanna hafi áður verið úrskurðaður í tíu ára endurkomubann vegna gruns um aðild að skipulagðri glæpastarfsemi, og að einu skráðu tekjur hans hafi verið félagsleg aðstoð frá Reykjavíkurborg. RÚV fjallaði um endurkomubannið í mars. Það kemur ekki fram í dómnum og Nútíminn hefur ekki fengið það staðfest.
Greiða tryggingafélaginu rúmar 2,7 milljónir
Mennirnir voru dæmdir til að greiða Verði tryggingum, sem bætti tjónið, 2.754.000 krónur óskipt, auk vaxta og 600 þúsund króna málskostnaðar. Kröfu lögreglustjórans á höfuðborgarsvæðinu um rúmar 538 þúsund krónur var vísað frá dómi. Hún byggði á því að embættið hefði greitt útlagðan kostnað eigenda bílsins vegna þess að verknaðurinn tengdist starfi lögreglukonunnar. Dómurinn segir að ekki hafi verið sýnt fram á að mennirnir hafi vitað að lögreglumaður ætti bílinn.
Mennirnir greiða einnig málsvarnarlaun verjenda sinna, sem eru á bilinu 2,6 til 2,8 milljónir króna á mann, og annan sakarkostnað. Þeir kröfðust frávísunar málsins á þeim forsendum að lögreglustjórinn á höfuðborgarsvæðinu og starfsmenn hans hefðu verið vanhæfir vegna tengsla við brotaþola. Dómurinn hafnaði því og sagði að héraðssaksóknari hefði stýrt rannsókninni frá fyrsta degi.
Fyrri ákæru í málinu var vísað frá dómi. Héraðssaksóknari gaf þá út nýja ákæru í febrúar, að því er mbl.is greindi frá. DV og Mannlíf fjölluðu um dóminn 28. október.
