Sjaldan hefur verið jafn mikil kjörsókn utankjörfundar og í þjóðaratkvæðagreiðslunni um aðildarviðræður Íslands við Evrópusambandið. Tveir dagar eru fram að kjördegi en fjöldi landsmanna hefur þegar gert upp hug sinn og greitt atkvæði.
Sigríður Kristinsdóttir, sýslumaðurinn á höfuðborgarsvæðinu, segir kjörsókn utan kjörfundar mun meiri en búist var við og enn séu tveir dagar til stefnu. Ljóst sé að áhugi landsmanna á málefninu sé mikill.
Sjaldan hafi jafn margir greitt atkvæði utan kjörfundar og ljóst sé að þátttaka verði meiri en í utankjörfundaratkvæðagreiðslum í kosningum undanfarinna ára.
Hátt í 49 þúsund hafi greitt atkvæði á landinu öllu, í sendiráðum og hjá ræðismönnum, þar af hátt í 33 þúsund á höfuðborgarsvæðinu.
Til samanburðar hafi rúmlega 28 þúsund greitt atkvæði utan kjörfundar á höfuðborgarsvæðinu í forsetakosningunum 2024 og 26 þúsund í alþingiskosningunum sama ár. Í forsetakosningunum árið 2020 hafi um 40 þúsund greitt atkvæði utan kjörfundar á höfuðborgarsvæðinu og 35 þúsund í alþingiskosningum árið 2021.
Sigríður segir nokkuð ljóst að kjörsókn utan kjörfundar taki fram úr þeim árum, í dag og á morgun.
Erfitt sé að segja til um hvað valdi svo mikilli þátttöku fyrir sjálfan kjördag. Eflaust geti árstíminn útskýrt það að einhverju leyti enda margir á faraldsfæti eða í sumarfríi þegar utankjörfundaratkvæðagreiðsla hófst.
