Þingflokkur Viðreisnar minnkaði í annað sinn á um það bil mánuði í dag þegar Ingvar Þóroddsson sagði sig úr flokknum og gekk í Sjálfstæðisflokkinn. Jón Gnarr sagði sig úr þingflokki Viðreisnar 15. október en sagðist þá styðja ríkisstjórnina áfram og verða flokksbundinn í Viðreisn.
Ingvar hefur tilkynnt forseta Alþingis og formanni og þingflokksformanni Viðreisnar um vistaskipti sín og að ríkisstjórnin geti ekki lengur reitt sig á hans stuðning. Þess í stað hefur hann ákveðið að starfa í stjórnarandstöðu.
„Ég verð að viðurkenna að ég man ekki hver braut ísinn,“ segir Ingvar í viðtali aðspurður um hvort hann eða Sjálfstæðisflokkurinn hafi átt frumkvæði að vistaskiptum hans. Hann byrjaði að ræða við Sjálfstæðismenn um það leyti sem Jón Gnarr sagði sig úr þingflokki Viðreisnar.
„Þá var ég líka kominn mjög langt með að taka þessa ákvörðun sjálfur.“
Hann segist hafa lofað forystu Viðreisnar þá að bíða með ákvörðun sína.
Ingvar var fulltrúi Viðreisnar í fjármálanefnd Alþingis en fluttur yfir í velferðarnefnd í staðinn fyrir mánuði síðan.
„Ég var skýr með það snemma í haust að ég gæti ekki stutt fjárlagafrumvarpið.“
Ingvar greindi frá vistaskiptum sínum í færslu á Facebook.
„Þessi ákvörðun er mér erfið og er tekin eftir langa íhugun. Mér þykir vænt um samstarfsfólk mitt í þingflokki Viðreisnar og ég hef eignast marga góða vini í flokknum. Ég er þakklátur fyrir samstarfið og traustið sem mér hefur verið sýnt. En ég ber líka ábyrgð gagnvart kjósendum mínum og minni sannfæringu.“
Ingvar segist hafa átt góð og uppbyggileg samtöl við forystu Sjálfstæðisflokksins og lýst yfir vilja sínum til að ganga til liðs við þingflokk hans. Hann hafi átt gott samstarf við þingmenn Sjálfstæðisflokksins, ekki síst oddvita flokksins í Norðausturkjördæmi.
Á ekki lengur samleið með ríkisstjórninni
Ingvar tilkynnti í dag að hann hefði sagt sig úr Viðreisn og gengið í Sjálfstæðisflokkinn. Hann segist hafa haft það að leiðarljósi að hlutverk stjórnmálamanna væri að auka frelsi fólks og skapa skilyrði fyrir sterkt atvinnulíf. Slíkt væri forsenda þess að byggja upp öflugt velferðarkerfi.
„Undanfarnar vikur og mánuði hef ég velt því fyrir mér hvort ég geti, innan núverandi stjórnarsamstarfs, staðið við það sem ég bauð mig fram til að gera. Síðasta kjördæmavika og fjárlagafrumvarpið fyrir árið 2027 gerðu mér ljóst að sannfæring mín og stefna ríkisstjórnarinnar, sem Viðreisn er hluti af, eiga ekki lengur samleið.“
Ingvar segir það verðugt markmið að ná hallalausum fjárlögum en gagnrýnir skattahækkanir. „Ríkisstjórn sem ætlar að ná tökum á ríkisfjármálunum þarf að sýna árangur í aðhaldi og hagræðingu áður en hún gengur enn frekar á tekjur fólks og þrengir að rekstri fyrirtækja.“
Hann segir ríkið taka til sín stærri hluta af kökunni með skattahækkunum í fjárlagafrumvarpi næsta árs. Hann gagnrýnir hækkun á virðisaukaskatti baðlóna og innleiðingu kílómetragjalds. Auk þess segir hann landsbyggðina hafa verið skilda eftir, svo sem með fækkun ferða landsbyggðastrætós og fækkun flugferða til Vopnafjarðar og Þórshafnar.
„Ég greiddi þessari samgönguáætlun atkvæði. Það voru mistök. Ég bið Austfirðinga afsökunar á því og tek ábyrgð á eigin atkvæði. Ég hefði átt að fylgja þeirri afstöðu sem ég hafði ítrekað lýst.“
Kosinn á þing 2024
Ingvar var kosinn á þing fyrir Viðreisn í Norðausturkjördæmi í síðustu þingkosningum. Hann er annar varaforseti Alþingis, fyrsti varaformaður atvinnuveganefndar og situr í velferðarnefnd. Viðbúið er að bæði Viðreisn og Sjálfstæðisflokkurinn breyti nefndaskipunum sínum þar sem Viðreisn losar hann úr stöðum sem hann hefur gegnt fyrir flokkinn og að Sjálfstæðisflokkurinn skipi hann í nefndir í staðinn.
Viðreisn hrókeraði í nefndaskipan sinni þegar Jón Gnarr sagði sig úr þingflokknum. Hluti af þeim breytingum var að Ingvar var færður úr fjárlaganefnd í velferðarnefnd.
Ingvar gagnrýndi í síðasta mánuði áform innviðaráðherra um að breyta reglum um Loftbrú, niðurgreiðslu á ferðakostnaði fólks á landsbyggðunum með flugi.
Tveir farnir úr þingflokknum eftir bestu kosningu flokksins
Viðreisn fékk ellefu þingmenn kjörna í kosningunum 30. nóvember 2024. Það var besta kosning í sögu flokksins. Nú, tæplega tveimur árum síðar, eru tveir þingmanna flokksins horfnir á braut úr þingflokknum. Ingvar gekk til liðs við Sjálfstæðisflokkinn og Jón Gnarr er þingmaður utan flokka.
Guðmundur Ingi Kristinsson, sem hefur verið á þingi fyrir Flokk fólksins síðan sá flokkur náði fyrst kjöri til Alþingis, sagði sig úr sínum flokki í apríl. Hann lýsti þó yfir áframhaldandi stuðningi við ríkisstjórnina.
Alls hafa því þrír þingmenn stjórnarflokkanna sagt sig úr flokknum sem þeir voru kjörnir fyrir eða úr þingflokki síns flokks.
Stjórnin enn með drjúgan meirihluta
Stjórnarflokkarnir fengu 36 þingmenn kjörna í nóvember 2024. Stjórnin heldur meirihluta sínum þrátt fyrir brotthvarf þriggja þingmanna. Guðmundur Ingi og Jón sögðust styðja stjórnina áfram. Með brotthvarfi Ingvars fækkar stuðningsmönnum stjórnarinnar um einn og verða 35 á móti 28 þingmönnum stjórnarandstöðuflokkanna.
Fréttin hefur verið uppfærð.