Lögreglan á Suðurnesjum rannsakar alvarlega líkamsárás í Reykjanesbæ aðfaranótt föstudags.
Grunur leikur á að fleiri en einn hafi ráðist á brotaþola og að barefli hafi verið beitt.
Þetta kemur fram í tilkynningu frá lögreglu.
„Húsleitir hafa verið framkvæmdar í tengslum við málið. Tveir sakborningar hafa verið handteknir og færðir til skýrslutöku en voru látnir lausir að skýrslutökum loknum“ segir í tilkynningunni.
Fleiri eru þó grunaðir um aðild að málinu. Þeirra er leitað.
Brotaþoli leitaði sjálfur á sjúkrahús. Hann er á þrítugsaldri. Þeir sem eru grunaðir eru á þrítugs, fertugs og fimmtugsaldri.
Samkvæmt heimildum fréttastofu er talið að brotið hafi verið gegn 2. mgr. 218. gr. hegningalaga. Það er sérstaklega hættulegt brot vegna þeirrar aðferðar sem beitt er við árásina. Refsing getur verið allt að 16 ára fangelsi.
