Gellustælar og ís­lenskar listagyðjur í París - Vísir

Sigríður Margrét, Naza Dapcevic og Karólína Kristbjörg Björnsdóttir stóðu að sýningunni, sem sameinaði ljósmyndun, fatahönnun og skartgripahönnun á einstakan máta og gestir og gangandi gátu fengið innsýn í ólíkar hliðar íslenskrar samtímasköpunar.

Sigríður er markaðsfræðingur og ljósmyndari frá Íslandi sem hefur unnið að fjölbreyttum verkefnum fyrir tísku- og tónlistarsenuna. Hún fangar fólk, staði og hversdagleg augnablik víðs vegar um Ísland og sýndi nokkrar vel valdar myndir í París. 

Neza starfar sem hönnuður og hefur náin tengsl bæði við Ísland og París. Hún kynnti verkefnið sitt HEIMA á sýningunni en það fjallar um heimili, uppruna og tengsl manneskjunnar við staði sem hún kallar heima.

Karólína er með skartgripalínuna Karo Lina Pieces Jewelry og kynnti jafnframt skartgripasafn sitt í París. Karo, eins og hún er alltaf kölluð, flutti í fyrra til Parísar til að læra. Hún sækir innblástur í íslenska náttúru og hráefni, meðal annars skeljar, steina, ull og fiskibein. Hönnun hennar sameinar þannig íslenskan uppruna hennar við nýtt og skapandi umhverfi í París.

Opnunarkvöldið var sérstaklega vel sótt og fjöldi gesta úr íslensku og alþjóðlegu skapandi senunni mætti til að sjá verkin, hitta hönnuðina og fagna íslenskri sköpun í París.

Á opnunarkvöldinu var boðið upp á drykki, tónlist og gjafir, meðal annars frá íslenska húðvörumerkinu Bioeffect og Feldi, sem studdu við verkefnið. Hér má sjá vel valdar myndir frá opnuninni: