Forsætisráðherra segist sjá gríðarlega spennandi tækifæri fyrir áfangastaðinn Ísland í fyrirhuguðu innviða- og náttúrugjaldi. Hún segir fleiri staði en við Gullna hringinn koma til greina þótt ekki sé tímabært að ræða það.
Bláskógabyggð mótmælir áformum um innviðagjald
Sveitarstjórn Bláskógabyggðar hefur mótmælt áformum stjórnvalda um fyrirhugað náttúru- og innviðagjald á ferðamannastöðum við Gullna hringinn í eigu ríkisins. Frumvarpið er í samráðsgátt stjórnvalda og er samráði nýlokið. Áætlaðar tekjur ríkissjóðs vegna gjaldsins eru sex til sjö milljarðar króna á ári. Einstaklingar sem ekki hafa skattalega heimilisfesti á Íslandi greiða gjaldið, 4500 krónur, 3000 krónur utan háannatíma, sem gildir í eitt ár.
Á að taka gjald af fleiri stöðum
Ingibjörg Isakssen þingmaður Framsóknar í Norðausturkjördæmi tók þetta mál upp á Alþingi í dag. „En ég vil spyrja í því ljósi þar sem við eigum nú ansi fjölsótta ferðamannastaði víðs vegar um landið, er það ætlun ríkisstjórnarinnar að útvíkka þetta fyrirkomulag um þetta innviða og náttúrugjald til fleiri ferðamannastaða á landinu,“ spurði Ingibjörg Ísakssen Kristrúnu Frostadóttur forsætisráðherra á Alþingi í dag.
Gríðarlega spennandi tækifæri
Forsætisráðherra segist sjá gríðarlega spennandi tækifæri fyrir áfangastaðinn Ísland í þessu nýja fyrirhugaða gjaldi, enda hafi þessi mál verið rædd í meira en áratug. „Það eru tækifæri falin í svona innleiðingu, það liggur alveg fyrir. Það eru alveg fleiri staðir á landinu en það er ekki tímabært að fara að velta því fyrir sér á þessum tímapunkti vegna þess að þetta er nógu stór stök aðgerð. Það breytir því ekki að ef vel gengur í svona fyrirkomulagi þá getur vel verið að aðrir aðilar, til dæmis einkaaðilar, hafi áhuga á að taka þátt, hvernig sé til dæmis hægt að auglýsa staði hringinn í kringum landið,“ sagði Kristrún Frostadóttir forsætisráðherra á Alþingi í dag.
