Hilmar Ingimundarson, framkvæmdastjóri fimleikafélagsins Bjarkar, hefur sagt starfi sínu lausu. Þetta tilkynnti hann foreldrum fyrir stuttu í gegnum appið Abler.
Hilmar tók við starfi sínu haustið 2023 og segir hann að félagið hafi þá staðið frammi fyrir verulegum rekstrarlegum og fjárhagslegum áskorunum. Mikil óvissa hefur verið um framtíð félagsins og var öllum þjálfurum eldri en 18 ára sagt upp hjá félaginu í síðasta mánuði, nokkuð sem Hilmar segir hafa verið þung skref.
Eftir það sagði Hilmar að full samstaða væri meðal starfsfólks um að halda starfi félagsins áfram og að hann væri bjartsýnn þrátt fyrir að framhaldið væri óljóst.
Síðan Hilmar tók við árið 2023 segir hann að tekjur af æfingagjöldum félagsins hafi aukist um 40% samhliða fjölgun í félaginu. Áskoranir félagsins séu áfram verulegar og segir hann að hækkandi laun og rekstrarkostnaður hafi aukið þrýsting á fjárhag félagsins.
„Áfram þarf að styrkja fjárhagslegar undirstöður þess. Þar skiptir stuðningur Hafnarfjarðarbæjar miklu,“ segir Hilmar í færslunni.
Fram undan séu nauðsynlegar breytingar í rekstri félagsins og þess sé að vænta að Hafnarfjarðarbær fylgi eftir fyrirheitum um aukinn stuðning við fimleikafélagið líkt og hann geri fyrir stærstu íþróttafélög bæjarins.
„Við þau tímamót er rétt að nýir stjórnendur taki við keflinu,“ segir Hilmar.
