Elías Guðmundsson, forstöðumaður meðferðarheimilisins Krýsuvíkur, vill að ráðist verði í forvarnir til að draga úr kókaínfíkn. Biðlistar eftir meðferð lengist sífellt.
Sprenging varð í innflutningi á kókaíni í fyrra.
Í Kveik í gær var fjallað um um mikla fjölgun þeirra sem reykja kókaín, sem er kallað krakk þegar það er reykt.
Meðferðaraðilar hafa orðið varir við aukna krakkneyslu.
Elías segir mikilvægt að forvarnir til að draga úr neyslu nái til barna, á skemmtilegan hátt.
Forvarnir virka ef börn eru fengin með
Elías segir að meðferðaraðilar á Krýsuvík finni vel fyrir aukningu á kókaínneyslu.
„Í fyrra var í fyrsta skipti sem kókaínneysla er algengasta efnið hjá okkar skjólstæðingum, áfengið hefur yfirleitt trónað á toppnum.“
Hann segir að skýringin á aukningunni liggi í miklu framboði á kókaíni.
Að mati Elíasar eru forvarnir alltaf góðar en hann segir nauðsynlegt að forvarnir gegn fíkniefnaneyslu verði meira áberandi.
Hann segir lögreglu og tollgæsluyfirvöld gera vel í að stoppa smygl og innflutning á eiturlyfjum en hann vill meiri áherslu á að draga úr eftirspurninni.
„Það mætti fara að vinna meira í eftirspurnarhliðinni. Því við aukum alltaf pláss en það eykst alltaf biðlistinn.“
En forvarnir, virka þær?
„Jájá, í einhverjum tilvikum ef það er vel gert. Líka ef krakkar eru fengnir með, ekki vera að segja þeim hvað á að gera. Heldur rætt við þau og þau frædd á einhvern skemmtilegan máta.“
