Hann var spurður almennt um viðbrögð hjá þingflokki og svaraði því einlæglega að vonbrigði hefðu verið einkennandi.
„En við erum náttúrlega í ríkisstjórn sem er að taka margar erfiðar ákvarðanir; við erum að fara að skila hallalausum fjárlögum, við erum að taka stjórn á útlendingamálum, við erum að snúa við margra ára stóriðjustoppi og við erum að sameina stofnanir. Við erum að taka margar ákvarðanir sem eru nauðsynlegar en erfiðar. Og það þarf sterk bein til að taka slíkar ákvarðanir.“
Erfiðar ákvarðanir ekki til vinsælda fallnar
Pawel var spurður hvort Ingvar hefði ekki þau sterku bein sem þurfti í slíkt og hann svaraði því svo til að þingmaðurinn væri ekki að yfirgefa flokkinn af góðri ástæðu.
„Það er auðvitað hans að meta það. En eins og ég segi þá þarf mjög sterk bein til að snúa við margra áratuga löngum hallarekstri. Flestar þessara ákvarðana eiga það sammerkt að vera ekki til vinsælda fallnar þegar þær eru teknar. En stóra myndin er auðvitað sú að við erum að stefna að hallalausum fjárlögum til að ná niður vöxtum og verðbólgu.“
Þingflokksformaðurinn taldi það ekki svo að verið væri að taka of erfiðar ákvarðanir þá á kostnað stefnu Viðreisnar.
„Okkar grunnstef er að ná niður vöxtum og verðbólgu. Og það er engin töfralausn til við því. Til þess þarf að ná tökum á rekstri ríkissjóðs. Þetta kallar á erfiðar ákvarðanir bæði á tekju- og útgjaldahlið.“
Ríkisstjórn nýtur stuðnings 35 þingmanna af 63
Pawel sagði þessar ákvarðanir ekki til vinsælda fallnar, ekki væri hægt að sameina prófastsdæmi án þess að fólk stæði upp og mótmælti því, sameining sýsluembætta, stofnana á heilbrigðissviði og svo framvegis, allt kallaði þetta á mótmæli.
„Ríkið hefur fækkað störfum hjá hinu opinbera um 200 manns, það er niðurskurður en líka tekjuöflun, sem miðar að lægri vöxtum til framtíðar.“
Pawel gaf ekki mikið út á það að áhyggjur þyrfti nú þegar tveir þingmenn hafa yfirgefið þingflokkinn. Gott samstarf væri við Jón Gnarr og ríkisstjórnin nyti stuðnings 35 þingmanna af 63.
„Það er aldrei góður dagur þegar fækkar í hópnum en við erum samheldinn hópur sem höfum þetta skýra markmið að ná hallalausum fjárlögum.“
Guðrún að búa til þá ímynd að ríkisstjórnin sé ósamstiga
Guðrún Hafsteinsdóttir formaður Sjálfstæðisflokksins gaf það út að hún væri í viðræðum við fleiri þingmenn. Pawel taldi hana vera að fiska í gruggugum sjó.
„Ég held að formaður Sjálfstæðisflokksins sé bara að búa til einhverja upplýsingaóreiðu og þá ímynd að ríkisstjórnin sé ósamstiga en hún nýtur enn stuðnings 35 þingmanna. Og gleymum því ekki að það hafa fjórir þingmenn Sjálfstæðisflokksins yfirgefið þingið frá því að síðast var kosið. Þannig að það er nú ekki þannig að þar séu engar breytingar á ferðinni.“
Pawel var spurður hvort þar væri ekki ólíku saman að jafna, þarna væri um að ræða óánægju með stefnuna, en hann sagði að það mætti alveg velta því fyrir sér hvers vegna fólk yfirgefi þingflokk og fari til annarra starfa. „Ég veit að Ingvar Þóroddsson er Evrópusinni. Ætlar hann að taka þátt í málþófi stjórnarandstöðunnar og reyna að koma í veg fyrir að mál sem snúa að EES-samningnum nái fram að ganga,“ spurði Pawel og var ekki hættur:
„Ætlar hann að ganga til liðs við fólk sem í allt sumar reyndi að sannfæra ungt fólk um að herkvaðning væri á næsta leiti og fékk það þannig til að segja nei í kosningunum? Ég ber auðvitað virðingu fyrir Ingvari Þóroddssyni og hans ákvörðunum en mér finnst skrítið að hann skyldi stíga frá borði í Viðreisn og svo Evrópusinnaður sem hann er ganga til liðs við flokk sem er mjög framarlega í því að slá þann draum út af borðinu.“