Páll Vilhjálmsson skrifar:

Friður í Úkraínu verður friður í Evrópu, segir Trump Bandaríkjaforseti, og bætir við af alkunnri hógværð að stríðslok verði stór og falleg. Evrópa er í taugaáfalli yfir orðum Trump, segir fyrirsögn Die Welt.

Taugaáfall Evrópu, í merkingunni pólitískt heilsufar leiðtoga álfunnar, stafar af samtengingu stríðsloka í Úkraínu og nýskipan öryggis- og varnarmála Evrópu. Ráðamenn Evrópu eru fangar orðræðu, að ekki sé sagt nauðhyggju, um sigur eða tortímingu. Annað tveggja sigri Úkraína Rússland sem leystist upp í smærri ríki í kjölfarið eða að Rússlandi hafi betur og leggi undir sig alla Evrópu í grimmu árásarstríði.

Hvorugur kosturinn styðst við raunsætt mat. Úkraína mun ekki sigra; Rússland er ekki í færum að leggja undir sig Evrópu. Meinlokan um tvo kosti, báða fjarstæðukennda, þjónar pólitískum tilgangi. Ráðamenn Evrópu stríðala Rússagrýluna til að réttlæta fjáraustur í tapað stríð. Rússar, um 140 milljón manna þjóð, leggur að velli 40 milljónir Úkraínumanna. Tekur kannski tíu ár. Eitt, og aðeins eitt, getur valdið hamingjuskiptum á vígvellinum. Nató-hermenn í liði Úkraínu. Evrópa sendir ekki sína soldáta í austurvíking. Rússar búa yfir kjarnorkuvopnum sem yrði beitt ef í harðbakkann slær.

Þriðji kosturinn, sem Trump varð á að nefna, og leiddi til örvinglunar í höfuðborgum Evrópu, er að öryggis- og varnarmál Evrópu og Rússlands verði undir í friðarsamningum um framtíð Úkraínu. Tengdasonur Bandaríkjaforseta og samningamaður, Jared Kushner, imprar nánar í færslu á X.

Friður í Úkraínu er ekki í sjónmáli. Evrópa tekur fyrst mark á Trump er öll sund lokast. Rússar gráta þurrum tárum að stríðið dragist á langinn. Staða þeirra batnar við samningaborðið í hlutfalli við landvinninga. Þegar Evrópa loks áttar sig verður vígstaðan sýnu verri en hún nú er.

Dýpri ástæður en Úkraína ein eru fyrir valkvæðu tornæmi leiðtoga Evrópu á raunsæjar hugmyndir Bandaríkjaforseta. Síðast þegar Bandaríkin og Rússland, þá í nafni Sovétríkjanna, skipuðu málum í Evrópu var við lok seinna stríðs. Evrópa var í sárum eftir gælur við fasisma með tilheyrandi ófriði.

Stofnun Evrópusambandsins og fyrirrennara átti að færa Evrópu möguleika að ráða örlögum sínum. Leiðtogar ESB-Evrópu vita sem er að stórveldafriður Bandaríkjanna og Rússlands í álfunni er svanasöngur Evrópusambandsins. ESB-Evrópa er ekki herra í eigin húsi. Aðeins blindir á alþjóðamál halda öðru fram. Til dæmis utanríkisráðherra Íslands.