Landsréttur staðfesti á fimmtudag áfrýjaðan dóm Héraðsdóms Reykjaness frá 20. nóvember 2025. Ríkissaksóknari skaut málinu til Landsréttar og krafðist ákæruvaldið þess að dómur yrði þyngdur. Þá krafðist maðurinn þess að málinu yrði vísað frá á þeim grundvelli að ákæran uppfyllti ekki lágmarkskröfur um meðferð sakamála. Hann hélt því meðal annars fram að hún væri óljóst orðuð og spannaði langt tímabil þannig að honum væri nánast ókleift að verjast henni.
Skapaði viðvarandi ógnarástand á heimili fjölskyldunnar
Í ákæru var maðurinn sakfelldur fyrir brot í nánu sambandi og brot á barnaverndarlögum gagnvart báðum dætrum sínum með því að hafa „endurtekið og á alvarlegan, sérstaklega sársaukafullan og meiðandi hátt ógnað lífi, heilsu og velferð [annarrar dótturinnar], með andlegu og líkamlegu ofbeldi og með því að skapa á fyrrgreindu tímabili viðvarandi ógnarástand á heimili fjölskyldunnar, með því að beita móður og systur [annarrar dótturinnar] ofbeldi innan veggja heimilisins á meðan hún var þar stödd,“ segir í málsatvikum Landsréttar.
Hann var ákærður fyrir heimilisofbeldi yfir rúmlega sex ára tímabil gagnvart fyrrverandi eiginkonu sinni og annarri dóttur þeirra, en þriggja ára tímabil gagnvart hinni dótturinni.
Beitti konuna ítrekað líkamlegu og andlegu ofbeldi
Meðal þess sem kemur fram í dómnum í héraði er að maðurinn hafi ítrekað beitt fyrrverandi eiginkonu sína líkamlegu ofbeldi, slegið hana, sparkað í hana og tekið hana hálstaki. Auk þess hafi hann beitt konuna bæði í eigin persónu og í skilaboðum í síma og á Messenger. Hann hafi hótað fyrrverandi konu sinni lífláti, barsmíðum, hótað henni með hníf og kallað hana öllum illum nöfnum.
Með þessari háttsemi er hann talinn hafa meðal annars misboðið dætrum sínum, vanrækt þær, beitt þær líkamlegum og andlegum refsingum þannig að líkamlegri heilsu þeirra var hætta búin og velferð þeirra ógnað.
Þá beitti hann einnig aðra dótturina líkamlegu ofbeldi á heimili þeirra með því að sparka í rassinn á henni, toga í hár hennar og ýta henni harkalega sem og andlegu ofbeldi með því að öskra á hana og tala til hennar með niðrandi hætti.
Ekki hafi verið tekið tillit til forsjárdeilu við framburð konunnar
Aðrar athugasemdir mannsins um hinn áfrýjaða dóm beinast meðal annars að því að ekki hafi verið tekið nægt tillit til þess að hann og fyrrverandi eiginkona hans og móðir stúlknanna hafi staðið í forsjár- og skilnaðardeilu við framburð konunnar. Þá hafnaði ákæruvaldið kröfum mannsins og hafnaði frávísun þess enda uppfylli ákæran lagaskilyrði um skýrleika dómsframkvæmda.
Þá var ákærði dæmdur til tveggja og hálfs árs fangelsisrefsingar í héraði og til að greiða brotaþolum miskabætur. Landsréttur vísaði hins vegar til þess að Héraðsdómur hefði stuðst við almennt refsiþyngingarákvæði til að þyngja dóm ákærða sem hann hafði ekki heimild fyrir.
Landsréttur samþykkti sakfellingu mannsins en stytti refsingu hans í átján mánaða fangelsisvist. Þá staðfesti Landsréttur sömuleiðis forsendur hins áfrýjaða dóms um að maðurinn greiddi miskabætur til allra þriggja brotaþolanna í málinu.
Honum var gert að greiða fyrrverandi eiginkonu sinni tvær og hálfa milljón í stað þriggja og hálfrar eins og kom fram í dómi Héraðsdóms. Að auki er honum gert að greiða henni eina og hálfa milljón króna og eina milljón króna fyrir hönd ólögráða dætra þeirra auk sakarkostnaðar.
