Veruleikinn er þó annar hjá sjónvarpsmanninum, uppistandaranum og skemmtikraftinum sem stýrir Kviss á Sýn, heldur spurningakeppnir fyrir fyrirtæki og hópa og kemur fram með Púðursykri í Sykursalnum í Grósku. Þegar hann kemst loks fyrir framan sjónvarpskjáinn eru reglurnar skýrar: Síminn á ekki að vera með í partíinu.
Sjónvarpsáhuginn byrjaði snemma og fyrsta minningin er af fremur stuttfættum karakter. „Fyrsti sjónvarpsþátturinn sem ég man eftir var Hlöðver grís enda kviknaði svínaáhuginn snemma hjá mér. Hlöðver grís var líka með eitt mest grípandi upphafsstef sjónvarpssögunnar.“
Hundar skipa sömuleiðis stóran sess í bíóminningunum. Fyrsta myndin sem hann man eftir að hafa séð í kvikmyndahúsi er Turner & Hooch með Tom Hanks en þá var hann um fimm ára. Nokkrum árum síðar varð hins vegar bíóferð, sem hann fór þó aldrei í, að eftirminnilegustu bíóferðinni.
Bíótráma af verstu gerð
„Svo átti ég alvöru bíótráma þegar ég var átta ára. Þá fór allur 7. flokkur Fylkis saman á hundamyndina Beethoven, akkúrat þegar ég var erlendis með fjölskyldunni. Þessi upplifun skildi eftir sig stóra holu sem ég er ennþá að reyna að fylla upp í með alls kyns fíknihegðun.“
Það er því greinilega hægt að missa af fleiru en fótboltaæfingu þegar fjölskyldan ákveður að skella sér til útlanda. Beethoven er enn óuppgert mál hjá Birni Braga, en í dag hafa heimildarmyndir að mestu tekið við af leiknum hundamyndum og öðrum kvikmyndum og sjónvarpsefni, en hann segist vera nær alveg hættur að horfa á leiknar bíómyndir.
Síðasta kvikmynd sem ég horfði á var Brutalist með Adrien Brody. Hún er þrír og hálfur tími að lengd, sem er algjört ofbeldi. Ég þurfti að horfa á hana í fimm lotum.
Íslenskt efni fær sitt pláss
Heimildaþættir um Mike Tyson og Matthew Perry á Netflix voru síðast á dagskránni og fá báðir góða einkunn. Íslenskt efni fær líka sitt pláss á skjánum.
„Svo horfi ég auðvitað á þetta helsta á Sýn eins og Heimsókn, Gulla byggir, Tónlistarmennina okkar og fleira. Ég er spenntur fyrir nýju Taskmaster-seríunni, þar verður frábær hópur af fólki.“
Áhorfið fer helst fram seint á kvöldin eða yfir kvöldmatnum og sjónvarpið sjálft fær að sinna sínu hlutverki. Tölvan og síminn eru ekki kvikmyndahús Björns Braga, þótt iPad fái stundum undanþágu á ferðalögum erlendis. Símanotkun á meðan góð mynd eða þáttur er í gangi fær hins vegar engan afslátt.
„Það er klárlega bannað að vera í símanum.“
Björn Bragi fær þó ekki alveg að ráða því sjálfur hvað hann maular yfir sjónvarpinu. Þar hafa aðrir sett honum ákveðnar skorður.
„Kristjana og Bjöggi á Sýn banna mér að borða snakk því ég á að líta vel út fyrir framan myndavélarnar. En ef ég fengi að ráða sjálfur væri ég aðallega að gúffa í mig þurrum kökum fyrir gamalt fólk yfir sjónvarpinu.“
Spurt og svarað
Hverjir eru uppáhaldsleikararnir þínir, íslenskir og erlendir?
„Uppáhaldsleikarinn minn er Jón Jónsson að leika konur.“
Ef þér væri boðið í búningamatarboð og gestirnir þyrftu að vera persónur úr sjónvarpsþáttum eða kvikmyndum, hvernig myndir þú mæta?
„Ég myndi mæta sem Björn Bragi úr sjónvarpsþáttunum Kviss.“
Hefurðu einhvern tímann hámhorft á þáttaröð þannig að þú hafir vakað alla nóttina af því að þú þurftir alltaf að klára næsta þátt?
„Já, margoft. Það er sko eiginlega draumalífið mitt. Að horfa bara á sjónvarp allar nætur og borða frosnar pítsur og snakk með ídýfu. Vera ekki í vinnu. Ég held að það sé miklu skemmtilegra líf en lífið sem ég lifi núna.“
Hvaða þátt eða kvikmynd myndirðu vilja geta gleymt alveg, bara til að fá að horfa á aftur í fyrsta sinn?
„Breaking Bad. Ég öfunda alla sem eiga eftir að sjá þá.“
Er einhver þáttaröð eða kvikmynd sem allir virðast elska en þú skilur ekki af hverju?
„Ég tengi mjög lítið við ofurhetjumyndir.“
Hvaða kvikmynd eða sjónvarpsþáttur hefur fengið þig til að hlæja mest?
„The Simpsons og Fóstbræður létu mig hlæja mest á yngri árum. Seinfeld á eldri árum.“
Hvort hentar þér betur að horfa á einn þátt í einu eða klára heila þáttaröð á einni helgi?
„Ég vil horfa hratt á allt saman. Ég get ekki lengur horft bara á einn þátt í viku eins og í gamla daga. Nú vil ég klára dæmið hratt.“
Áttu þér eitthvert „guilty pleasure“ þegar kemur að sjónvarpsþáttum eða kvikmyndum?
„Íslensku Biggest loser þættirnir voru alveg „guilty pleasure“ hjá mér á sínum tíma.“
Ef gerð yrði sjónvarpsþáttaröð um líf þitt, hvaða leikari ætti að leika þig?
„Saga Garðarsdóttir.“
Ef þú mættir aðeins mæla með einum sjónvarpsþætti og einni kvikmynd við lesendur, hvað myndirðu velja?
„Gæti nefnt ansi margar kvikmyndir en fyrsta sem kemur upp í hugann er The Departed. Af sjónvarpsþáttum hef ég svolítið gaman að góðum míniseríum eins og Dopesick og Chernobyl.“
Hvaða illmenni úr sjónvarpi eða kvikmyndum gætirðu hugsað þér að vingast við?
„Ég myndi vilja vera vinur Patreks Jaime sem var illmennið í nýjustu þáttaröð Kviss.“
Ef lífið þitt væri sjónvarpsþáttur, væri það gamanþáttur, drama, spennuþáttur, raunveruleikaþáttur eða eitthvað allt annað og hvað héti hann?
„Það væri ljúfsárt gamandrama sem gerist í bakaríi. Ég væri að baka alls konar þurrar kökur og svo kæmu fastakúnnar og við myndum ræða um lífið og tilveruna. Þátturinn héti Björnsbakarí.“
