Skrifað var undir samninginn á fimmtudag og var hann samþykktur í velferðarráði af fulltrúum allra flokka utan Miðflokksins.
Í fundargerð velferðarráðs segir að miðað við óbreyttan starfsmannafjölda teymisins, sem lagt var niður í uppsögnum í ágúst, komi fram að áætlaður kostnaður vegna móttökunnar sé 380 milljónir króna en ríkið greiðir borginni samkvæmt sérstökum þjónustusamningi. Þó muni einhver kostnaður falla á borgina.
„Maður er að reyna að vera hóflegur í þessum útreikningum en okkur reiknast til að jafnvel með greiðslunum frá ríkinu séu svona 20-30 milljónir útistandandi,“ segir Ragnhildur Alda í viðtali í hádegisfréttum Bylgjunnar.
„En varðandi þessa þjónustusamninga við ríkið þá þurfa sveitarfélögin bara að hætta að þjónusta umfram það sem ríkið er að greiða okkur fyrir að þjónusta,“ bætir Ragnhildur Alda við og nefnir málaflokka í velferðar- og skólaþjónustu sem dæmi.
„Svo uppgötvum við allt í einu að það þarf meiri þjónustu til að ná árangri og þá förum við einhvern veginn að gera það frítt fyrir ríkið. Það gengur ekki upp.“
„Stundum er fólk lengur“
Erfitt sé þó að segja til um allan kostnað.
„Það þarf kannski meira en þessa grunnaðstoð, kannski kemur eitthvað upp á eins og að börn þurfi umframþjónustu eða eitthvað slíkt,“ segir Ragnhildur Alda.
Hún segir að samningurinn snúi að því að Reykjavíkurborg hjálpi fólki sem hefur fengið alþjóðlega vernd í húsnæðisleit og veiti því félagslega aðstoð. Vinnumálastofnun sjái svo um íslenskukennslu og atvinnumiðaðan stuðning.
„Einstaklingur á flótta sem hefur fengið vernd mætir hingað til lands og kann ekki á neitt, hvernig virkar heilsugæslan, hvernig virka skólarnir og samfélagið í heild. Vinnumálastofnun vísar þeim til okkar og við leiðbeinum þeim inn í íslenskt samfélag.“
„Við erum að tryggja það að hér sé bein leið í íslenskt samfélag og það gengur yfirleitt vel og svo stundum er fólk lengur,“ en hún segir fulla greiðslu vera greidda fyrsta árið en síðan minnki greiðslurnar eftir tvö og þrjú ár.
Lína minnihlutans sé galin
Ragnhildur Alda segir að stjórnvöld hafi ekki ætlað að endurnýja þjónustusamninginn og því hafi ákvörðun um uppsagnir starfsfólks verið tekin í ágúst.
„Þið voruð að kaupa þessa þjónustu af okkur og ef þið viljið ekki versla hana lengur þá erum við ekkert að fara að veita þessa þjónustu lengur. Við bara sögðum ókei, þá bara hættum við með þetta, ekkert mál. Nema svo komu þau til baka og sögðu að þau vildu gjarnan halda áfram með samninginn og vera enn þá með þennan þjónustusamning þannig að þá bara héldum við áfram líka,“ segir Ragnhildur Alda um aðdragandann að því að samningurinn var endurnýjaður.
Tuttugu og tveir störfuðu í móttökuteyminu í ágúst. Ragnhildur Alda segir að einhverjir hafi farið í önnur störf við uppsögn en aðrir verið á uppsagnarfresti og segir hún að það starfsfólk ætli að halda áfram störfum.
Minnihluti borgarstjórnar hefur gagnrýnt ferli uppsagna hjá borginni og kallað þær sýndarmennsku þegar ráða þurfi fólk á ný sem áður hafi verið sagt upp. Ragnhildur Alda segir þetta ekki rétt.
„Minnihlutinn virðist einhvern veginn halda að hér sé komið fólk sem leikur sér að einhverju svona vegna þess að þetta sé eitthvað sem okkur finnst skemmtilegt, alls ekki. Þetta er ógeðslega erfitt. Það leikur sér enginn að því að fara í uppsagnir og það er kannski til marks um málefnaþurrð hjá minnihlutanum að þetta sé línan sem þau eru að reyna að taka, sko. Af því að hún er svo galin,“ segir Ragnhildur Alda að lokum.
