Einar Jóhannes Guðnason, bæjarfulltrúi Miðflokksins í Kópavogi og varaþingmaður flokksins, gagnrýnir Sjálfstæðismenn sem hafa lýst andstöðu við heimsókn Muhammad Taqi Usmani til Íslands. Hann segir suma þeirra nú taka undir áhyggjur sem Miðflokksmenn hafi áður verið kallaðir rasistar fyrir að viðra.
Þetta kemur fram í færslu Einars á X föstudaginn 30. október. Usmani er pakistanskur trúarleiðtogi sem hélt fyrirlestur í Stórmoskunni í Reykjavík. Heimsókn hans hefur verið gagnrýnd.
Einar segir Sjálfstæðismenn hafa stigið fram og lýst andstöðu við það sem hann kallar öfgahugmyndafræði Usmani. Hann fagnar þeirri afstöðu en spyr hvar sannfæringin hafi verið þegar Miðflokksmenn og aðrir íhaldsmenn vöruðu við því að slík hugmyndafræði fengi fótfestu hér á landi.
„Þá vorum við kallaðir rasistar og sakaðir um að ala á fordómum, meðal annars af fólki sem tekur nú í sama streng.“
Gagnrýni Einars beinist jafnframt að stefnu Sjálfstæðisflokksins í landamæra- og útlendingamálum. Hann segir Miðflokksmenn hafa gagnrýnt undanlátssemi flokksins og kallað eftir ábyrgari stefnu. Viðbrögðin hafi þá verið önnur en nú, þegar Sjálfstæðismenn gagnrýni boðskap Usmani.
Einar heldur því einnig fram að einstakir Sjálfstæðismenn sem tóku undir áhyggjurnar hafi sætt mótstöðu innan eigin flokks. Hann segir menn hafa verið púaða niður á landsfundi fyrir að leggja fram breytingatillögur.
Hann dregur í efa að viðbrögðin nú endurspegli djúpstæða sannfæringu og spyr hvort afstaðan ráðist af því hvað njóti meðbyrs hverju sinni.
„Er hér um raunverulega stefnubreytingu að ræða eða eru menn einfaldlega að stökkva á vagn þeirrar stemningar sem nýtur meðbyrs hverju sinni?“
Þrátt fyrir gagnrýnina segist Einar fagna því ef Sjálfstæðismenn hafi breytt um afstöðu.
„Ég ætla þó ekki að nudda Sjálfstæðismönnum endalaust upp úr fortíðinni, það er bara gott ef þeir hafa séð ljósið.“
Í lok færslunnar segir hann stefnu Miðflokksins hafa verið stöðuga, einnig þegar hún hafi verið óvinsæl. Hann telur að breytingar í útlendingamálum verði ekki án aðkomu flokksins.
„En ef menn vilja alvöru breytingar í útlendingamálum þá verða þær ekki án Miðflokksins.“
Færsluna má sjá hér að neðan.
Heimsókn Muhammad Taqi Usmani í Stórmoskuna í Reykjavík hefur vakið athygli undanfarna daga og óhug hjá mörgum.
— Einar Jóhannes (@einarjoh) 30. október 2026
