Hjálparsamtökin Solaris tilkynntu ekki um fjársöfnun fyrir hælisleitendur fyrr en hálfu ári eftir að henni lauk. Þetta kemur fram í ákæru á hendur Semu Erlu Serdaroglu, stofnanda samtakanna, sem fréttastofa hefur undir höndum.
Eins og fram hefur komið var Sema ákærð fyrir brot á lögum um opinberar fjársafnanir vegna landssöfnunar fyrir Palestínu snemma árs 2024.
Samkvæmt lagagreininni sem er vísað er í skal tilkynna sýslumanni um opinbera fjársöfnun áður en hún hefst.
Í ákærunni segir að söfnunin hafi staðið dagana 7. febrúar til 4. mars 2024 en tilkynning um fjársöfnunina hafi ekki verið send sýslumanninum á Suðurlandi fyrr en 3. september sama ár.
Málið var þingfest í Héraðsdómi Reykjavíkur í gær og í Facebook-færslu Semu segist hún hafa neitað sök og aðalmeðferð málsins fari fram í lok október.
Í færslunni deilir Sema á meðferð málsins. Hún segir að fáir kannist við lög um opinberar safnanir og ákveðnum ákvæðum sé ekki fylgt. Sýslumaðurinn sem heldur utanum fjársafnanir hafi „árum saman bent ráðuneytinu á nauðsyn þess að uppfæra lögin til nútímans“.
