Rauður fáni með merki Alþýðufylkingarinnar fyrir frelsun Palestínu (PFLP), sem er á hryðjuverkalistum Evrópusambandsins og Bandaríkjanna, virðist hafa verið á lofti í Palestínugöngu í miðborg Reykjavíkur laugardaginn 10. október.

Gangan var farin frá Hlemmi að Austurvelli klukkan 13 í tilefni alþjóðlegs aðgerðadags á vegum Félagsins Ísland-Palestína.

Á mynd frá göngunni sést áberandi rauður fáni með arabísku letri og merki sem samsvarar auðkenni PFLP, marxísk-lenínískra palestínskra samtaka sem stofnuð voru árið 1967 og hafa staðið að vopnuðum árásum, meðal annars gegn óbreyttum borgurum.

Arabíska letrið á fánanum vísar til nafns samtakanna, Alþýðufylkingarinnar fyrir frelsun Palestínu.

Samtök gegn gyðingaandúð óska skýringa

Fulltrúi Samtaka gegn gyðingaandúð á Íslandi hefur samkvæmt skilaboðum sem Fréttin.is hefur undir höndum sent Sveini Rúnari, einum af forsvarsmönnum göngunnar, fyrirspurn vegna fánans.

Í skilaboðunum eru lýstar áhyggjur af því að tákn samtaka sem eru á hryðjuverkalistum skuli sjást í samstöðugöngu á Íslandi.

Þar kemur jafnframt fram að þótt fólk geti verið sammála um mikilvægi þess að styðja fórnarlömb átaka sé ástæða til að gæta að því hvaða pólitísku skilaboð séu send undir merkjum slíkrar samstöðu.

Spurningin sem vaknar er hvort skipuleggjendur göngunnar hafi vitað af fánanum og hver afstaða þeirra sé til þess að tákn PFLP séu sýnd á opinberum samstöðufundi á Íslandi.

Ekki liggur fyrir hver bar fánann eða hvort nærvera hans hafi verið með vitund eða samþykki skipuleggjenda.

Fréttin.is hefur ekki fengið staðfest hvort svar hafi borist við fyrirspurninni.