Síðari umræðu um þingsályktunartillögu utanríkisráðherra varðandi framhald viðræðna um aðild Íslands að Evrópusambandinu var frestað laust fyrir klukkan hálf tólf í kvöld. Utanríkisráðherra er á mælendaskrá þingfundar sem hefst klukkan þrjú á morgun ásamt átta þingmönnum Miðflokksins.
Þeir hafa farið fram á að leynd verði aflétt af gögnum áður en hægt verður að greiða atkvæði um tillöguna. Þau gögn munu vera geymd í fundarherbergi sem allir þingmenn í utanríkismálanefnd hafa aðgang að.
Fleiri þingmenn stjórnarandstöðu tóku undir kröfuna. Stjórnarandstaðan hótar því að láta ekki af umræðu, þvert á samkomulag um að klára hana í gær og greiða atkvæði um málið, sem meirihlutinn taldi vera í gildi.
Stjórnarliðar leggja til að þjóðaratkvæðagreiðslan verði haldin 29. ágúst og til að það gangi eftir þarf að ljúka umræðunni í þessari viku og meirihluti þingheims að samþykkja þingsályktunartillöguna. Minnihlutinn í utanríkismálanefnd leggur til að þjóðaratkvæðagreiðslan verði 17. október.
