Einhverjir eru væntanlega farnir að telja niður í almyrkva á sólu 12. ágúst. Ógrynni varnings má fá sem helgaður er atburðinum.
Sólmyrkvamynt hefur verið slegin, listfengir hanna eigin almyrkvagripi og selja og svo er það hefð hjá mörgum að lyfta glasi með freyðandi drykk á hátíðarstundu – og franskt kampavínshús býður upp á kampavínið Almyrkva af þessu tilefni.
En fleiri drykkir helgaðir þessu náttúruundri eru í boði. Eigendur brugghússins Malbyggs höfðu haft spurnir af því að víða erlendis væri bruggaður bjór í tilefni sólmyrkva.
Bjórinn fær heiti sitt frá ljósinu
„Þannig að við ákváðum að brugga bjór til að minnast þessa viðburðar sem fékk nafnið Ljós,“ segir Magnús Már Kristjánsson, framkvæmdastjóri viðskiptaþróunar hjá Malbygg.
„Við hugsuðum vel og lengi um nafnið – vorum svolítið að hugsa um Myrkva fyrst – en svo hugsuðum við: Nei, tengjum hann frekar við ljósið sem kemur aftur þegar viðburðurinn er búinn.“
Hvað er klukkan?
Þeir sem vilja vera með á nótunum og vita hvað klukkan slær þann 12. ágúst geta orðið sér úti um úr sem var hannað í tilefni almyrkvans og fæst nú í takmörkuðu upplagi hjá Gilbert úrsmiði. „Okkur fannst það bara upplagt,“ segir Sigurður Gilbertsson úrsmiður.
Spurður hvað greini sólmyrkvaúrið frá öðrum úrum segir Sigurður það vera ýmislegt. Til dæmis sé áferð skífu þess með tunglmynstri, á því sé örmjór hringur sem lýsir í myrkri og þá er letrað á það tímasetningin þegar almyrkvinn verður í Reykjavík.
Af öðrum sólmyrkvavarningi má nefna húfu sem fæst víða í minjagripaverslunum fyrir ferðamenn og sólmyrkvasúkkulaði frá Nóa Siríus.
Sævar Helgi Bragason, Stjörnu-Sævar, selur ýmsan almyrkvavarning; meðal annars sólmyrkvagleraugu, sólarsíur fyrir síma og sólmyrkvaboli til að fjármagna fræðslu um sólmyrkvann.
Og hafi einhver velt fyrir sér hvernig þetta náttúrufyrirbæri smakkast, þá gæti svarið leynst í skyrdós frá Ísey, sem nýverið setti á markað Sólmyrkvaskyr.
