159 mál eru á þingmálaskrá ríkisstjórnarinnar. Fjármála- og efnahagsráðherra er með flest eða 26 en forsætisráðherra og utanríkisráðherra fæst eða 7 hvor.
Sanngirnisbætur, náttúru- og innviðagjald, heildarendurskoðun á lögum um hvalveiðar og bókun 35 eru á meðal þeirra mála sem ráðherrar ríkisstjórnarinnar ætla að setja á dagskrá 158. löggjafarþings sem sett var í dag.
Í nóvember hyggst Kristrún Frostadóttir forsætisráðherra leggja fram frumvarp um almennar sanngirnisbætur sem er ætlað að gefa þeim sem hafa sem börn sætt óforsvaranlegri meðferð, sem er beint eða óbeint á ábyrgð hins opinbera, kost á að sækja um sanngirnisbætur. Eftir áramót ætlar hún að leggja fram frumvarp sem ætlað er að einfalda regluverk. Þar verður meðal annars horft til innleiðingar á EES-reglum og hvort gengið sé lengra en nauðsynlegt sé til að markmið laga náist.
Hanna Katrín Friðriksson atvinnuvegaráðherra leggur í september fram frumvarp um framlengingu búvörusamnings til ársloka 2027. Nýtt frumvarp um náttúru- og innviðagjald á að líta dagsins ljós í október. Því er ætlað að skapa umgjörð um auðlindagjald fyrir aðgang ferðamanna að náttúruperlum landsins. Þá er að vænta frumvarps um hafeldi og heildarendurskoðunar á lögum um dýravelferð og lögum um hvalveiðar. Hún hefur áður boðað frumvarp sem bannar veiðarnar.
Þorbjörg Sigríður Gunnlaugsdóttir dómsmálaráðherra leggur í september fram frumvarp sem felur í sér aðgerðir gegn skipulagðri brotastarfsemi. Gera þarf breytingar á alls 93 lagabálkum vegna sameiningar sýslumannsembætta í eitt og ráðherra ætlar að leggja fram frumvarp um fækkun lögregluembætta úr níu í fjögur til fimm. Von er á nýrri heildstæðri öryggislöggjöf og endurflutningi frumvarps um ný heildarlög um almannavarnir. Ráðherra hyggst breyta refsirammanum vegna vændiskaupa til að draga úr eftirspurn.
Í september ætlar Ragnar Þór Ingólfsson, félags- og húsnæðismálaráðherra, að leggja fram frumvarp sem leigusamninga sem felur í sér að mánaðarleg vísitölutenging leigufjárhæðar verði óheimil. Hann boðar frumvarp um heildarendurskoðun laga um almennar íbúðir með það að markmiði að húsnæðisstuðningskerfið stuðli enn frekar að auknu framboði íbúða.
Líkt og áður segir eru flest málin á þingmálaskrá komin frá Daða Má Kristóferssyni, fjármála- og efnahagsráðherra, eða 26 talsins. Þar má meðal annars nefna endurflutt frumvarp um afnám áminningarskyldu opinberra starfsmanna, frumvarp um breytingar á lögum um fasteignalán sem ætlað er að draga úr vægi verðtryggingar og breytingar á lögum um kílómetragjald. Á kynningu fjárlagafrumvarps í gær kom fram að til stæði að hækka gjaldið.
Alma Möller heilbrigðisráðherra boðar frumvarp sem hámarkar fjölda kynfroma sem hægt er að nota frá sama gjafa við tæknifrjóvganir. Hún hyggst leggja fram tillögu til þingsályktunar um stefnu í einstaklingssniðinni heilbrigðisþjónustu út frá erfðaupplýsingum og sömuleiðis endurflytja þingsályktunartillögu um aðgerðaáætlun vegna offitu á Íslandi.
Von er á frumvarpi um afnám undanþága orkumannvirkja frá fasteignamati frá Eyjólfi Ármannssyni innviðaráðherra. Lögunum er ætlað að tryggja nærsamfélagi virkjana sanngjarnari hlutdeild en áður í ávinningi af raforkuframleiðslu. Hann ætlar einnig að endurflytja frumvarp sem felur í sér heildarendurskoðun sveitarstjórnarlaga og tryggja vernd sæstrengja með lögum. Þá boðar ráðherrann frumvarp um byggðatengdar veiðiheimildir sem ætlað er að skýra nánar úthlutun þeirra.
Logi Einarsson, menningar-, nýsköpunar- og háskólaráðherra, boðar hækkuð fjárframlög til einkarekinna fjölmiðla, meðal annars með því að draga því sem nemur 10% af auglýsingatekjum RÚV frá tekjum stofnunarinnar af útvarpsgjaldi. Í frumvarpi um breytingu á lögum um Ríkisútvarpið verður auk þess kveðið á um hámark auglýsingatekna RÚV.
Hann ætlar að skera upp herör gegn ólögmætri dreifingu sjónvarpsefnis, svokallaðri sjóræningjastarfsemi, með hækkun refsingar fyrir brot gegn höfundalögum. Þá boðar ráðherrann frumvarp til laga um djúpfalsanir og ný heildarlög sem miða að því að rukka streymisveitur um svokallað menningarframlag.
Lagafrumvarp um aðgang barna að samfélagsmiðlum er væntanlegt frá Ingu Sæland, mennta- og barnamálaráðherra. Hún hyggst líka endurflytja frumvarp sem felur í sér ný heildarlög um barnavernd. Þá má einnig búast við sérstöku frumvarpi um breyttan útivistartíma barna.
Jóhann Páll Jóhannsson, umhverfis- orku- og loftslagsráðherra, ætlar að endurflytja ný heildarlög um loftslagsmál. Það á að tryggja nánari útfærslu markmiðs um kolefnishlutleysi eigi síðar en árið 2040. Í september er von á nýju frumvarpi um innleiðingu nýs ETS-kerfis, hins svokallaða ETS2-kerfis, sem nær til losunar frá byggingum, vegasamgöngum og smærri iðnaði. Eftir áramót hyggst ráðherra leggja fram frumvarp um raforkuöryggi sem ætlað er að tryggja öruggan aðgang heimila og smærri fyrirtækja að raforku.
Þorgerður Katrín Gunnarsdóttir utanríkisráðherra ætlar í september að endurflytja frumvarp til laga um Evrópska efnahagssvæðið, sem í daglegu tali er kölluð bókun 35. Frumvarpinu er ætlað að gera nauðsynlegar breytingar til þess að bæta innleiðingu bókunar 35 við EES-samninginn og tryggja fulla virkni hans hér á landi.
