Tólf þjóðir hafa tilkynnt að þær hyggist takmarka viðskipti við landtökubyggðir Ísraelsmanna á Vesturbakkanum. Ísland er þar á meðal. Utanríkisráðherra Bretlands sakar Ísraelsmenn um að horfa fram hjá þjóðernishreinsunum á Vesturbakkanum.
Þjóðirnar tólf sendu frá sér sameiginlega yfirlýsingu um þvinganirnar. Auk Íslands voru þetta Kanada, Danmörk, Noregur, Svíþjóð, Finnland, Írland, Bretland, Spánn, Portúgal, Frakkland og Pólland. Í yfirlýsingunni kemur fram að aðgerðir Ísraelsmanna á Vesturbakkanum grafi undan möguleikanum á tveggja ríkja lausn. „Ástandið versnar hratt vegna fordæmalauss ofbeldis af hálfu landtökufólks og stækkunar landtökubyggða. Ríkisstjórn Ísraels verður að stöðva stækkun landtökubyggða án tafar,“ segir meðal annars í yfirlýsingunni.
Þar kemur jafnframt fram að þjóðirnar staðfesti þá fyrirætlun sína að koma á eigin takmörkunum og/eða styðja evrópskar takmarkanir á viðskiptum við landtökubyggðir – eða grípa til annarra aðgerða.
Meðal vara sem fluttar hafa verið til Evrópu frá landtökubyggðum eru Medjool-döðlur, mangó, avókadó, vínber og ólífuolíur.
Ísraelsmenn hafa aukið verulega árásir sínar á palestínsk þorp á Vesturbakkanum undanfarnar vikur og hernumið svæði undir landtökubyggðir. Stjórnvöld í Ísrael samþykktu í fyrra stækkun landtökubyggðanna um 1.200 íbúðir sem hafði lengi verið í undirbúningi. Þetta stangast á við alþjóðalög líkt og landtökubyggðir Ísraelsmanna almennt. Stækkunin hefur verið fordæmd víða um heim.
Ed Miliband utanríkisráðherra Bretlands tilkynnti á breska þinginu í morgun að innflutningsbann yrði sett á vörur sem væru framleiddar á þessum hernumdu svæðum. Hann sakaði Ísraelsmenn um að horfa fram hjá þjóðernishreinsunum sem ættu sér stað af hálfu landtökufólks. „Ég trúi því ekki að Bretar vilji að við styðjum hernámið með því að taka við framleiðslum frá landtökubyggðum í verslunum okkar og stórmörkuðum,“ sagði hann. Þess má geta að Miliband er sjálfur gyðingur.
Jean-Noel Barrot utanríkisráðherra Frakklands tilkynnti á X að Frakkar hættu viðskiptum við landtökubyggðir. Frakkar hafa lengi þrýst á Evrópusambandið að grípa til sameiginlegra viðskiptaþvingana en ekki er samstaða um slíkt meðal ríkja innan sambandsins. Þýskaland og Tékkland hafa meðal annars sett sig upp á móti því.
Ísraelsmenn hafa brugðist illa við þessum tíðindum og saka Breta um gyðingahatur. Isaac Herzog forseti Ísraels segir ákvörðunina mistök og að hún sé mikil afskipti af lýðræðislegum kosningum sjálfstæðs ríkis. Þingkosningar fara fram þar 27. október. Þá hefur gyðingasamfélagið í Bretlandi lýst yfir áhyggjum og segir aðgerðirnar geta haft ófyrirséðar afleiðingar.
