Páll Vilhjálmsson skrifar:

Millilending á Íslandi var á dagskrá í Grænlandsför Ursulu von der Leyen forseta framkvæmdastjórnar Evrópusambandsins. Tilgangurinn var að fagna með ríkisstjórn Kristrúnar Frostadóttur já-i í þjóðaratkvæðagreiðslu og leggja grunn að hröðu aðlögunarferli. En Íslendingar sögðu nei á höfuðdaginn. Millilendingu á Íslandi var aflýst.

Grænlandsheimsókn von der Leyen var ákveðin með löngum fyrirvara. Veigamikill þáttur í ferðalagi forseta framkvæmdastjórnarinnar vestur á bóginn var kraftbirting Evrópusambandsins á Norður-Atlantshafi. Efir ESB-já á Íslandi var áætlunin að Grænland yrði næst og þar á eftir Noregur. Planið var að íslenskt já myndi hrinda af stað 18-24 mánaða ferli þar Ísland yrði ESB-ríki. Grænland stæði á þröskuldinum og sterk ESB-bylgja risi í Noregi.

Íslenska nei-ið 29. ágúst splundraði áformum Evrópusambandsins um ,,vinveitta“ yfirtöku á þrem lykilríkjum á Norður-Atlantshafi. Brussel ætlaði að nota ríkin þrjú í reipdrætti við Trump-stjórnina í Washington um völd og áhrif í þessum heimshluta. Taugaáfall íslenskra ESB-sinna í gær vegna landakorts Trump af bandarískri Norður-Ameríku með úteyjunum Grænlandi og Íslandi er kómískt endurvarp hugarvíls vegna ónýtra áforma Evrópusambandsins.

Þorgerður Katrín utanríkisráðherra hafði selt ráðamönnum ESB þá hugmynd að Íslendingar myndu samþykkja í þjóðaratkvæðagreiðslu að hefja á ný viðræður um aðild. Já til að sjá herferðin var hönnuð í þeim tilgangi. Eftir að já-ið væri komið yrði litið svo á, bæði af ríkisstjórn Íslands og ESB, að staðfastur vilji þjóðarinnar væri að ganga í Evrópusambandið. Hröð aðlögun og milljarðar í stuðning til áhrifavalda á Íslandi, s.s. háskóla, fjölmiðla og félagasamtaka, átti að gera Ísland að ESB-ríki á tveim árum.

Von der Leyen útskýrði norðursókn Evrópusambandsins í fyrravor í hátíðarræðu í gömlu keisaraborginni Aachen í Þýskalandi.

Í ræðunni kynnir von der Leyen til  sögunnar ,,sjálfstæða Evrópu“ í hörðum heimi valdastjórnmála. Skilgreiningin á Evrópu er afhjúpandi:

Og þegar ég segi Evrópa, á ég vitanlega við Evrópusambandið. En ég er þeirrar skoðunar að vegferðin verði farin með vinum og samstarfsaðilum. Frá vesturhluta Balkanskaga til Úkraínu og Moldavíu. Frá Grænlandi til Bretlands og víðar. Skylda okkar er að tryggja stöðugleika á meginlandinu með sýn á sameiginlega framtíð. (feitletr. pv)

Í framhaldi talar forseti framkvæmdastjórnar ESB um að sambandið þurfi að hrista af sér hlekki fortíðar og grípa til aðgerða hratt og örugglega. Líkt og stórveldi gera þegar hagsmunum þeirra er ógnað. Ræða von der Leyen vorið 2025 kom ekki eins og þruma úr heiðskíru lofti. Hugveita, að mestu fjármögnuð með Brussel-fé, birti stuttu áður stefnuplaggið Stækkun ESB í norður í sjónmáli? Frumkvæði á óvissutímum. Í fyrrahaust samþykkti Evrópuþingið norðurslóðastefnu í sama anda. Markviss stöðutaka ESB á norðurslóðum átti að hefjast með íslensku já-i 29. ágúst.

Rétt eftir Aachen-ræðu von der Leyen í fyrra var hún mætt til Íslands að hitta þær Kristrúnu og Þorgerði Katrínu. Sumarið 2025 var undirbúningur að ,,vinveittri“ yfirtöku Íslands kominn á fullt skrið. Ráðherrar Viðreisnar skrifuðu undir samstarfsyfirlýsingar við ESB og létu eins og málið væri í höfn, Ísland yrði ESB-ríki.

Nærri má geta að nei Íslendinga höfuðdaginn fyrir rúmri viku var þungt högg fyrir ESB. Millilendingu á Íslandi var aflýst en Grænlandsheimsóknin látin standa. Enn má reyna að kreista fram grænlenskt já.

Grænland fór inn í Evrópusambandið með Danmörku snemma á áttunda áratug síðustu aldar. Heimastjórn fékk Grænland 1979 og sagði sig úr Evrópusambandinu sex árum síðar, í byrjun árs 1985. Eftir að Trump Bandaríkjaforseti lýsti áhuga að eignast Grænland risu Danir og ESB á afturlappirnar og sögðu nýlenduna réttmæta eign Dana og á áhrifasvæði Evrópusambandsins.

Von der Leyen ber fé á Grænlendinga til að kaupa vinsældir. Bandaríkjamenn munu gera slíkt hið sama. Um leið og Grænlendingar taka við erlendu fé kvarnast úr takmarkaða sjálfstæðinu sem þjóðin þó nýtur. Fyrr en seinna verða grænlenskir að gera upp á milli Bandaríkjanna og Evrópusambandsins. Uppgjörið mun kljúfa grænlensku þjóðina í Bandaríkjavini og ESB-sinna. Íslendingar forðuðu landi og þjóð frá grænlenskum örlögum með nei-i. Smáþjóð sem verður bitbein stórveldahagsmuna farnast yfirleitt illa.

Í sögulegum annálum verður höfuðdagurinn þriðji mikilvægasti sjálfstæðisdagur Íslendinga, á eftir 1. desember og 17. júní.