Konur sem vinna í Eiffel-turninum voru beðnar um að fara afsíðis og í sumum tilfellum voru karlmenn fengnir til að ganga í störf þeirra á laugardag. Það gerðist þegar Mahant Swami Maharaj, leiðtogi Bochasanwasi Akshar Purushottam Swaminarayan Sanstha, sem er trúfélag hindúa með náin tengsl við Narendra Modi, forsætisráðherra Indlands, kom og heimsótti turninn á laugardag.
Þetta gerðu stjórnendur Eiffel-turnsins að beiðni trúfélagsins sem bað um að trúarleiðtoginn þyrfti sem minnst að umgangast konur meðan á heimsókninni stóð.
Sú ákvörðun dró dilk á eftir sér því starfsfólk var mjög ósátt og í gær var Eiffel-turninn lokaður meðan stjórnendur ræddu við starfsfólk. Turninn var opnaður aftur í morgun.
Starfsmannafélag Eiffel-turnsins fordæmdi að stjórnendur gæfu út fyrirmæli sem leiddu til þess að konum væri vikið til hliðar, karlmenn látnir ganga í þeirra störf og þær gerðar ósýnilegar vegna kyns síns. Í yfirlýsingu félagsins segir að sumar starfskonur hafi verið beðnar um að yfirgefa vinnustað sinn í turninum og halda fyrir annars staðar meðan á heimsókninni stóð.
Aurore Berge, jafnréttisráðherra Frakklands, lýsti hneykslan sinni og sagði að í Frakklandi væri ekki hefð fyrir því að segja konum að vera ósýnilegar. Væntanlegu forsetaframbjóðendurnir Marine Le Pen og Gabriel Attal gagnrýndu ákvörðun stjórnenda Eiffel-turnsins líka.
Forsvarsmenn Eiffel-turnsins báðust afsökunar og sögðust hafa gert mistök með því að fallast á beiðni gestanna. Bochasanwasi Akshar Purushottam Swaminarayan Sanstha-samtökin báðust afsökunar á þeim sársauka og óþægindum sem þetta hefði valdið fólki.
