Senn líður að hrekkjavöku sem vinnur sér sífellt sterkari sess sem tyllidagur hér á landi. Grasker og annar varningur tengdur hátíðinni er áberandi í verslunum og sala á þessum árstíma hefur margfaldast.
Margir kjósa að skera út í graskerin og nota sem skraut í anda hrekkjavökunnar. Við útskurðinn fer mikill tími í að tæma graskerið áður en hægt er að skera út andlit og ýmsar kynjaverur.
En hvað á að gera við innvolsið?
Margir henda graskersgumsinu en tilvalið er að nýta það í matargerð. Þó að stóru hrekkjavökugraskerin séu ekki alveg jafn sæt og góð og þau sem ræktuð eru beinlínis til matar, þá eru þau vel æt. Marta María Arnarsdóttir, skólameistari Hússtjórnarskólans, segir að hægt sé að nota innvolsið á ýmsa vegu.
„Auðvitað er hægt að rista fræin eða búa til graskerssúpu.“
Grasker eru ávextir af graskersætt og eru því uppfull af graskersfræjum sem eru gjarnan ristuð og notuð í ýmiss konar matargerð. Hægt er að skella olíu og góðu kryddi á fræin og rista í ofni. Eins er hægt að búa til graskerssúpu úr innvolsinu og hægt er að nálgast ýmsar góðar uppskriftir á netinu.
Og Marta bendir á enn fleiri leiðir til að nýta graskerin.
„Innvolsið er svo oft nýtt í dýrafóður eða jafnvel kökur, álíka og gulrótakaka.“
Grasker eru nefnilega ekki bara hrekkjavökuskreytingar sem dúkka upp einu sinni á ári heldur eru þau einmitt víða ræktuð og notuð í skepnufóður. Graskersbaka eða kaka er svo auðvitað víðfræg en tilvalið er að prófa sig áfram í bakstrinum með innvolsið.
Að hrekkjavöku lokinni er hægt að farga graskerinu í lífrænar tunnur en eigi fólk húsdýr, t.d. hænur, eru þær líklega sólgnar í kerið. Einnig er hægt að nýta sér hjálp þeirra við graskersútskurðinn sjálfan eins og sjá má á myndbandinu hér fyrir neðan.
