Stefnt er að því að fulltrúar Rússlands, Úkraínu og Bandaríkjanna fundi um Úkraínustríðið síðar í þessum mánuði. Þetta sagði Volodymyr Zelensky forseti Úkraínu við fréttamenn í morgun, þar sem hann ræddi fundi sem Steve Witkoff og Jared Kushner samningamenn Bandaríkjanna áttu í bæði Moskvu og Kyiv um helgina.
Zelensky sagðist vilja halda fund í haust. „Ef september gengur upp væri það frábært. Því fyrr, því betra,“ sagði Zelensky.
Hann sagði jafnframt að hann vonaðist til að hitta Donald Trump forseta Bandaríkjanna síðar í þessum mánuði til að ræða loftvarnir í Kyiv. Hann yrði eftir 20. september.
Þessir fyrirhuguðu fundir eru framhald viðræðna Witkoffs og Kushners við Pútín og Zelensky um síðustu helgi. Þær virðast ekki hafa skilað miklu þó að þær hafi verið á jákvæðum nótum. Witkoff sagði að viðræðurnar hefðu verið uppbyggilegar og að Trump ynni hörðum höndum að því að koma á varanlegum friði. Hann viðurkennir þó að báðir þurfi að gefa eftir eigi samkomulag að nást. Dmitry Peskov talsmaður rússneskra stjórnvalda sagði að hann útilokaði ekki þríhliða viðræður en of snemmt væri að tala um stað og stund í þeim efnum. Þá sagði Zelensky að Bandaríkin væru að vinna að því að draga úr átökunum áður en vetur gengi í garð.
Lítið hefur hins vegar komið fram um hvað var rætt efnislega á þessum fundum. Zelensky sagði að í viðræðunum við Bandaríkin hefði verið rætt um orkumannvirki, flutninga á korni og útflutning á olíu og gasi. Hann vildi ekki tjá sig frekar. Í morgun virtist Sergei Lavrov utanríkisráðherra Rússlands þó hafna tillögu Tyrkja um vopnahlé á Svartahafi. Hann sagði það óraunhæft og ómögulegt að hafa eftirlit með því. Og hvað sem jákvæðum tóni líður hafa þjóðirnar ekki færst nær samkomulagi um stríðslok.
Langt á milli Rússa og Úkraínumanna
Fjölmiðlar hafa greint frá því að Vladimír Pútín hafi sagt þeim Witkoff og Kushner að Rússum væri að vaxa ásmegin á vígvellinum. Úkraínumenn hafi hins vegar haft aðra sögu að segja – Úkraínumenn hafi náð til sín meira af landi en þeir hafi tapað í ágúst og á sama tíma hafi 42 þúsund Rússar annaðhvort fallið eða særst.
Þá hafi Pútín einnig sagt við Bandaríkjamennina að ráðast þyrfti að rót átakanna, sem í raun undirstrikar þá kröfu að Úkraínumenn gefi eftir land, hætti við að ganga í NATO og minnki her sinn. Zelensky ítrekaði á hinn bóginn kröfur sínar um öryggistryggingar, sem myndi þýða sterkan her, auk þess sem hann sýndi engin merki þess að vilja gefa eftir land.
Þetta gefur til kynna að sú eftirgjöf sem Witkoff segir að sé nauðsynleg af hálfu beggja aðila sé ekki í sjónmáli. Og á meðan svo er, gera stjórnvöld í Úkraínu ráð fyrir áframhaldandi stríðsátökum inn í veturinn.
Og sömu sögu er að segja af bandamönnum Úkraínumanna. Bretar tilkynntu í morgun að þeir myndu setja 100 milljónir punda í loftvarnir í Úkraínu næsta vetur, þar á meðal Patriot-eldflaugar. Þá myndu þeir einnig leggja til loftvarnarflaugar og dróna inn í stuðning NATO við Úkraínu.
Árásir halda á sama tíma áfram á Úkraínu. Tveir voru drepnir í eldflauga – og drónaárás Rússa á Kyiv í nótt. Þetta fyrsta árásin sem var gerð eftir að Vladimír Pútín forseta Rússlands hafði fyrirskipað hlé á árásum meðan þeir Witkoff og Kushner funduðu með leiðtogum Rússlands og Úkraínu. Miklar skemmdir urðu á íbúðarhúsum í borginni og voru nokkrir fastir í rústum eftir sprengingarnar. „Eldflaugar hans [Pútíns] tala hærra en orðin um samningaviðræður sem frá honum koma,“ sagði Andriy Sybiga utanríkisráðherra Úkraínu í morgun, um leið og hann sagði árásina hafa verið hræðilega.
