Háskóli Íslands stóð fyrir málþingi í dag um niðurstöður PISA-könnunarinnar. Þar kom fram að efla þurfi kennaranám og beita skýrri og markvissri kennslu.
„Það er auðvelt að segja grípa inn í. Ef þetta væri rosa einfalt væri búið að laga það,“ segir Berglind Gísladóttir, dósent við menntavísindasvið.
„En við þurfum að leita leiða og vinna saman með öllum hagaðilum til þess að bæta kennslu inni í skólastofum á Íslandi,“ bætir hún við.
Þú talar um gæði kennslunnar, er það vandamálið, ástæðan fyrir því að við erum á botninum?
„Þetta er ekki einföld spurning. Það liggur beint við að til þess að efla námsárangur þurfi að efla gæði kennslu og við getum ekki eflt gæði kennslu nema við setjum púður í að efla það sem gerist inni í kennslustofunni. Það er gert með því að efla kennaranám.“
Berglind segir jafnframt að nemendur í kennaranámi eigi oft erfitt með að helga sig náminu þar sem þeir eru í 100% kennslu samhliða.
Jákvæðu niðurstöðurnar úr PISA-könnuninni eru að íslenskum nemendum virðist almennt líða vel í skólanum.
„Það eru hópar innan skólakerfisins sem þarf að horfa sérstaklega til eins og nemendur af erlendum uppruna og nemendur sem eru með kynskráninguna kynseginn/annað,“ segir Kristján Ketill Stefánsson, dósent við Menntavísindasvið HÍ.
„Líðan þeirra og öryggi er mun lakara en dæmigerðra nemenda á Íslandi,“ bætir hann við.
Kristján Ketill vinnur sem stendur að rannsókn um tengsl símanotkunar og lítils áhuga á lestri.
„Sérstaklega þar sem símanotkun er óhófleg, þar eru mjög skýr tengsl við litla ánægju af lestri,“ segir hann.
„Skýrar reglur um símanotkun eru af hinu góða. Ég held að það sé ekki upphaf og endir lesskilnings, það sem við þurfum fyrst og fremst er skýr og markviss kennsla og kennsluhættir sem styðja við eðlilegan stíganda í lestrarkunnáttu og þar höfum við mjög mikil tækifæri til að bæta okkur,“ segir Kristján.
