„Hér er botni náð. Við höfum í rauninni eina leið að fara og það er upp,“ segir Inga Sæland, barna- og menntamálaráðherra, sem boðaði í dag nýjar aðgerðir sem eiga að stuðla að bættum námsárangri grunnskólanema.
Frammistaða íslenskra grunnskólanema hefur aldrei mælst verri en í nýjustu PISA-könnun.
Liður í aðgerðum ráðherra er að 455 milljónir króna fari beint í gerð nýrra námsgagna auk fjárveitinga til að efla raunvísindagreinar.
Magnús Þór Jónsson, formaður Kennarasambands Íslands, segir þetta góða byrjun. Hann væri þó til í að sjá hærri upphæð.
„Annað sem skiptir okkur gríðarlega miklu máli er að lyfta starfsþróun kennara. Staðan er sú að í dag vantar okkur inn í grunnskóla 20% fagmenntaða kennara. Þegar við erum líka með slæm námsgögn þá erum við að gera kröfur til kennara sem eru jafnvel ekki með fagmenntun að koma að taka við hópum og búa til námsefni sjálfir,“ segir Magnús.
Síðan Inga Sæland tók við menntamálaráðuneytinu hafa hún og Magnús eldað grátt silfur og til að mynda tekist á um matskerfi og fjölda skóladaga.
„Við höfum í rauninni aldrei verið ósátt þó að okkur hafi nú svona kannski skriplað á skötu eitthvað aðeins,“ segir Inga. „Hjarta okkar slær nákvæmlega í takt við alla aðra sem vilja snúa þessari þróun við.“
Áherslubreytingar liður í slæmu gengi
Magnús segir einn þátt í slæmu gengi nemenda á PISA-könnuninni vera breytingar á áherslum í menntamálaráðuneytinu síðustu ár. Hann segir umræðu sambærilega umræðu dagsins í dag alltaf hefjast í kjölfar þess að niðurstöður könnunarinnar eru birtar. „Það hefur því miður of oft gerst að umræða stoppar,“ segir hann.
„Ef við ætlum að ná árangri þurfa foreldrarnir að vera með, allt kennarasamfélagið og svo sannarlega ráðuneytið og rekstraraðilarnir því þá munum við ná árangri, ég er alveg sannfærður um það.“
Menntamálin hafi ekki verið í forgangi
Inga segir ljóst að menntamálin hafi ekki verið í þeim forgangi sem þau ættu að vera. „Við erum í rauninni að gjaldfella framtíð þessara barna,“ segir hún. „Þau eiga mjög erfitt uppdráttar jafnvel þó að þau eigi sína drauma, væntingar og þrár í áframhaldandi nám. Þá hafa þau bara ekki getu til þess að sinna erfiðu framhaldsskóla eða hvað þá háskólanámi.“
Inga Sæland og Magnús Þór Jónsson voru gestir í Kastljósi kvöldsins. Þáttinn má sjá í heild sinni í spilaranum hér að neðan.
