Bæjarstjórnarflokkur Sjálfstæðisflokksins í Grindavíkurbæ klofnaði í afstöðu sinni til ráðningar Péturs G. Markan sem nýs bæjarstjóra á bæjarstjórnarfundi í gær.
Guðbjörg Eyjólfsdóttir, oddviti sjálfstæðismanna, kaus með því að staðfesta ráðningarsamning Péturs og það gerðu einnig bæjarfulltrúar Framsóknarflokksins og Miðflokksins. Hjálmar Hallgrímsson og Ómar Davíð Ólafsson, bæjarfulltrúar Sjálfstæðisflokksins, sátu aftur á móti hjá.
Ekki er eiginlegt meirihlutasamstarf til staðar í bænum heldur hafa flokkarnir þrír sem hlutu kjör í bænum ákveðið að vinna saman að uppbyggingu samfélagsins.
Hefði viljað sjá annan umsækjanda ráðinn
Pétur hefur nú tekið við sem bæjarstjóri og tekur hann við keflinu af Fannari Jónassyni, sem hafði verið bæjarstjóri frá árinu 2017.
Áður hefur Pétur verið bæjarstjóri í Hveragerði og sveitarstjóri Súðavíkurhrepps.
„Það er náttúrulega alveg greinilega ekki eining um ráðningu bæjarstjóra. Við vorum ekki alveg sammála um ráðninguna og það liggur alveg ljóst fyrir. Þar af leiðandi sitjum við bara hjá,“ segir Hjálmar, annar þeirra sem sat hjá, í samtali við mbl.is.
Hjálmar hefði fremur viljað sjá annan umsækjanda ráðinn í starf bæjarstjóra næstu árin.
„Það var möguleiki á öðru en það er bara eins og það er. Það var meiri hluti fyrir þessu þó við værum ekki sammála og þess vegna sátum við nú bara hjá,“ segir Hjálmar sem vill þó ekki gefa upp hvern af umsækjendunum 23 hann hefði viljað sjá ráðinn.
Geta ekki verið að karpa um svona hluti
Átt þú von á því að þessi ágreiningur muni lifa eitthvað inn í kjörtímabilið?
„Við höfum bara miklu stærra verkefni fyrir höndum og höfum því ekki efni á því að vera að karpa um einhverja svona hluti. Það er bara áfram gakk og bara að vinna á fullu. Það er einhugur um að það að vinna að málefnum Grindavíkur,“ svarar Hjálmar.
Að lokum segist Hjálmar vonast til þess að Pétur standi sig vel í starfinu, hann sé alla vega bjartsýnn og voni það besta.
