Hundruðum flugferða var seinkað á stórum flugvöllum í Bandaríkjunum í dag eftir að byggingarverkamenn skáru óvart í sundur kapal sem er nauðsynlegur fyrir flugumferðarstjórn.
Flug voru stöðvuð eða þeim seinkað seinni part dagsins í dag á flugvöllum í New York, Pennsylvaníu, New Jersey og Massachusetts.
Fjarskiptafyrirtækið Verizon, sem á kapalinn, segist ekki bera ábyrgð á skemmdunum en að unnið sé að viðgerð eins fljótt og auðið er, að því er fram kemur í frétt BBC. Skemmdirnar á kaplinum höfðu áhrif á kerfið sem er notað til að leiðbeina flugvélum við flugtak og lendingu, að sögn samgönguyfirvalda.
Alþjóðaflugvöllurinn Newark Liberty í New Jersey varð verst úti í truflunum á flugumferðarstjórn í dag en 267 brottförum seinkaði þaðan í dag. 257 flugferðum sem voru á leið til Newark var einnig seinkað.
Sean Duffy, samgönguráðherra Bandaríkjanna, segir að skemmdirnar á kaplinum hafi orðið við framkvæmdir starfsmanna Amtrak í New Jersey, ríkisfyrirtækis sem sér um lestarkerfi milli borga í Bandaríkjunum.
