Áströlsk yfirvöld ætla að senda herflugvél til að aðstoða við slökkvistarf á indónesíska hluta Borneó en skógareldar hafa valdið miklu tjóni og mengun í landinu. Eldarnir hafa logað mánuðum saman og heilsuspillandi loftmengun af völdum þeirra hefur borist áfram til nágrannaþjóða.
Herflugvélin flaug til Austur-Kalimantan-héraðs á Borneó í gær til að taka þátt í slökkvistarfi samkvæmt ástralska sendiráðinu í Indónesíu.
Flugvélin er miðlungsstór herflutningaflugvél og getur sleppt yfir 100.000 lítrum af vatni á hverjum degi. Ástralir leggja einnig til aðra minni flugvél og alls tuttugu manna teymi sem mun taka þátt í slökkvistarfinu sem ráðgert er að standi yfir fram á fimmtudag í næstu viku.
Talið er að yfir 1,9 milljónir hektara hafi brunnið í skógareldum á fyrstu níu mánuðum ársins. Sérfræðingar segja að stór hluti eyðileggingarinnar sé vegna þess að land er rutt með því að fella og brenna gróður fyrir nýræktun, pálmaolíuframleiðslu og námavinnslu.
Ýmis eitruð efni berast í andrúmsloftið af völdum skógareldanna og menguninni fylgja agnir sem fara í lungu og blóðrásina og geta valdið veikindum og dauða.
Heilbrigðisráðuneyti Indónesíu segir að yfir 400.000 manns hafi fengið meðferð við öndunarfærasjúkdómum af völdum mengunarinnar. Þá létust yfir 3.500 af völdum mengunar í september.
