Boðar nýtt sam­komu­lag um „ger­valla Evrópu“ við Rússa - Vísir

Forsetafrúin tók í dag á móti erindrekum frá bæði Rússlandi og Úkraínu í Hvíta húsinu. Var það í kjölfar þess að hún kom að því að koma á staðbundnu vopnahléi í bænum Oleshky í Úkraínu. Bærinn hefur um nokkurt skeið verið í höndum Rússa og hafa borist þaðan fregnir af hræðilegum aðbúnaði íbúa og harðræði sem þeir eru beittir af Rússum.

Kirill Dmitriev var einn rússnesku erindrekanna en hann hefur komið að viðræðum milli Rússlands og Bandaríkjanna ásamt þeim Jared Kushner, tengdasyni Trumps, og Steve Witkoff, vini forsetans. Hann heiðraði Melínu Trump sérstaklega og færði henni þakkir frá Pútín fyrir að hafa bjargað fjölda mannslífa.

Sjá einnig: „Þeir eru að borða gras úr garðinum og snigla“

Dmitriev tók ekki fram af hverju þessum fjölda mannslífa var ógnað eða hverjir ógnuðu þeim.

Þakkaði konu sem er sökuð um að ræna börnum

Með honum var Yana Lantratova, sem ber titilinn mannréttindafulltrúi Rússlands. Hún hefur verið sökuð um að koma að ráni Rússa á þúsundum úkraínskra barna á undanförnum árum. Þá er hún einnig þekkt fyrir mjög harða afstöðu gegn því sem rússneska ríkið kallar „LGBT-áróður“.

Hún hefur verið beitt refsiaðgerðum af bæði Bandaríkjunum og Evrópu, vegna aðkomu sinnar að flutningi barna frá Úkraínu til Rússlands.

Melanía Trump lofaði Lantratovu og sagði að framlag hennar færði þeim sem hefðu komið illa út úr stríðinu „von og reisn“.

Vólódímír Selenskí, forseti Úkraínu, sagði frá því í kvöld að Úkraínumenn hefðu orðið varir við það að úkraínsk börn sem Rússar hefðu rænt væru í einhverjum tilfellum komin í rússneska herinn.

Á viðburðinum voru einnig þeir Davyd Arakhamia, formaður þingflokks „Þjónn fólksins“ flokks Vólódímírs Selenskí, forseta Úkraínu, og Dmytro Lubinets, mannréttindafulltrúi Úkraínu.

Arakhamia þakkaði Melaníu Trump fyrir aðkomu hennar að vopnahléinu staðbundna og bað hana um að beita sér frekar til að hjálpa úkraínsku þjóðinni og að finna fleiri leiðir til að draga úr spennu og koma á vopnahléi.

Sjálf sagði forsetafrúin að hún vonaðist til þess að vopnahléið í Oleshky yrði glóðin sem kveikti varanlegt friðarbál, eins og hún orðaði það.

Vopnahléið sanni að Pútín gæti stöðvað átökin

Eins og frægt er hét Trump því fyrir forsetakosningarnar 2024 að koma á friði í Úkraínu á sínum fyrsta degi í embætti forseta, eða jafnvel fyrr. Það hefur reynst honum mjög erfitt. Rússar hafa ekkert komið til móts við Bandaríkjamenn eða látið af kröfum sínum í garð Úkraínu á undanförnum tveimur árum.

Þær kröfur fela í raun í sér uppgjöf Úkraínumanna á mikilvægu landsvæði sem Rússar hafa ekki getað tekið með hervaldi og önnur skilyrði sem myndu gera Úkraínumenn berskjaldaða fyrir annarri innrás seinna meir.

Rússar hafa einnig ítrekað talað um að leysa þurfi svokallaðar „grunnástæður“ innrásar sinnar í Úkraínu en það er tilvísun í kröfur þeirra frá því fyrir innrásina sem fela í sér að ríkjum Austur-Evrópu verði vísað úr Atlantshafsbandalaginu.

Selenskí sagði einnig í kvöld að vopnahléið í Oleshky sannaði það að ef Pútín vildi stöðva átökin, þá myndu átökin stoppa.

„Stórt og fallegt“ samkomulag

Eftir þennan viðburð ræddi Donald Trump við blaðamenn í skrifstofu sinni í Hvíta húsinu. Þá var hann spurður hvort hann hefði rætt við erindreka Rússlands og Úkraínu. Þá sagðist forsetinn hafa rætt við Dmitriev.

Hann vildi ekki segja hvað þeir hefðu talað um en sagði „stórt og fallegt“ samkomulag í vændum.

Trump sagði að samkomulag þetta myndi ekki eingöngu snúast um Úkraínu. Í rauninni snerist það um alla Evrópu og hélt hann því fram að „allir“ yrðu hæstánægðir með það.

Hvaða samkomulag það er er óljóst en bandarískir erindrekar hafa að undanförnu þrýst á ráðamenn í Evrópu um að hefja aftur kaup á jarðgasi frá Rússlandi. Bandaríkjamenn hafa um nokkurt skeið gagnrýnt Evrópu harðlega á þeim grunni að nokkur ríki heimsálfunnar hættu ekki að kaupa jarðgas af Rússum eftir innrásina í Úkraínu 2022.

Ríki Evrópu hafa á undanförnum árum dregið verulega úr kaupum á jarðgasi frá Rússlandi síðan innrásin í Úkraínu hófst og eru ráðamenn í heimsálfunni sagðir hafa lítinn áhuga á að gera sig aftur háða rússneskri orku.

„Hin hliðin drepur líka“

Trump var einnig spurður út í ítrekaðar árásir Rússa á óbreytta borgara í Úkraínu. Mannfall meðal þeirra hefur aukist töluvert á undanförnum vikum og mánuðum.

Að minnsta kosti 42 eru látnir eftir að Rússar vörpuðu mörgum stórum sprengjum á skóla í bænum Komyshuvakha í suðurhluta Úkraínu í vikunni. Þar höfðu íbúar bæjarins komið saman, eins og þeir hafa gert reglulega á undanförnum vikum, til að fá mataraðstoð.

Fleiri sprengjum var svo varpað og drónaárásir gerðar í kjölfarið og segir forsetinn að þeim hafi í einhverjum tilfellum verið miðað á byrgi sem fólk hafði leitað sér skjóls í. Sprengjur féllu einnig á rústirnar þegar björgunaraðilar voru að störfum.

Sjá einnig: Sprengjum varpað á skóla meðan fólk beið eftir brauði

Þær árásir fylgdu á hæla fjölmargra annarra mannskæðra árása á óbreytta borgara í Úkraínu.

Þegar Trump var spurður hvort hann hefði rætt þessar árásir við Dmitriev, sagðist Trump alltaf gera það.

„Ég nefni þær alltaf. Ég nefni þær líka á hinn bóginn. Hin hliðin drepur líka. Margt fólk er að deyja.“

Þá hélt Trump því fram að um 25 þúsund manns féllu í átökunum á hverjum mánuði.

„Rússar eru líka að missa óbreytta borgara. Þetta er blóðbað. Þessu þarf að ljúka og ég held að við munum fljótt binda enda á það.“