J.D. Vance varaforseti Bandaríkjanna birti langa yfirlýsingu á samfélagsmiðlinum X þar sem hann sagði Íransstríðið vera ástæðu þess að Repúblikanar töpuðu þingkosningum og bað þá sem gætu að færa rök fyrir því að sá fórnarkostnaður hafi verið þess virði.
„Ég held að það sé nokkuð augljóst að Vance er að undirbúa forsetaframboð og hann er að fjarlægja sig stefnu Trumps og í rauninni stríðsmálaráðherranum sem nú stóð nú fyrir innrás Bandaríkjanna í Íran, sem og Marco Rubio utanríkisráðherra. Hann er farinn að fjarlægja sig þessum þremur mönnum sem hafa helst stýrt utanríkisstefnu Bandaríkjanna á síðustu misserum,“ segir Baldur Þórhallsson, prófessor í stjórnmálafræði. „Og er með því að vonast eftir því að kjósendur líti hann aðeins öðrum augum heldur en þessa valdaelítu í Washington.“
Baldur segir Vance einnig vera að beina athyglinni frá efnahagsmálum með því að varpa ábyrgð á ósigrinum einungis á Íransstríðið. Hann telur ástæðu úrslitanna hins vegar ekki svo einfalda.
„Ég held að það sé nokkuð ljóst að meirihluti bandarískra kjósenda hafnaði hægristefnu Trumps í þessum kosningum, stefnu sem byggir á íhaldssömum gildum, verndarstefnu í viðskiptum og viðskiptaívilnunum fyrir vildarvini. Á sama tíma eru ákveðnir hópar í Bandaríkjunum að hafna ofbeldisfullri innflytjendastefnu hans sem og stríðsrekstrinum í Íran.“
Hann telur að naflaskoðun sé fram undan innan beggja flokka fyrir forsetakosningar.
„Það verða átök á milli ólíkra sjónarmiða innan flokkanna. Annars vegar innan Repúblikanaflokksins, um hvort það eigi að halda stefnu Trumps nánast óbreyttri eða hvort það eigi að reyna að færa flokkinn inn á miðjuna og ná aftur þeim kjósendum sem flokkurinn hefur núna misst.“
„Hjá Demókrötum snýst þetta um hvort þeir eigi að halda sig á miðjunni eins og flestir frambjóðendur gerðu núna í kosningunum eða hvort flokkurinn eigi að taka upp róttækari stefnu eins og sumir frambjóðendur náðu góðum árangri með því að gera. Það er þá að lofa velferðarkerfi í Bandaríkjunum að norrænni fyrirmynd, ræða skattahækkanir á þá efnameiri, frjálslyndari innflytjendalöggjöf og stuðning Bandaríkjanna við þróunaraðstoð, svo nokkrir málaflokkar séu nefndir. Um þetta verður tekist á og það er náttúrulega ómögulegt að segja hvað verður ofan á,“ segir Baldur.
