Pétur Marteinsson, oddviti Samfylkingarinnar, telur Viðreisn og Framsókn hafa gefið eftir nær öll sín stefnumál með því að ganga til meirihlutasamstarfs með Sjálfstæðisflokki. Þá telur hann ólíklegt að flokkur hans muni ná miklum málefnalegum snertifleti við Miðflokkinn í samstarfi flokkanna í stjórnarandstöðu.
Sjálfstæðisflokkur, Framsókn og Viðreisn tilkynntu fyrr í dag að samningar hefðu náðst flokkanna á milli um að starfa saman í borgarstjórn og var málefnalisti nýs meirihluta birtur sem Pétur telur bera sterkt handbragð Sjálfstæðisflokks.
„Ég óska Hildi Björnsdóttur til hamingju með nýjan meirihluta og hlakka til að vinna með þeim og sérstaklega veita þeim ríkt aðhald sem ég tel líklegt að verði mikið,“ segir Pétur í samtali við mbl.is.
„Af því litla sem maður hefur séð frá flokkunum er augljóst að Framsókn og Viðreisn hafa gefið eftir í nær öllum sínum málum, þá sérstaklega í samgöngumálum þar sem Björg talaði um að framkvæmdir samgöngusáttmála ættu að hefjast tafarlaust og ég minni á að Einar Þorsteinsson skrifaði undir samgöngusáttmálann fyrir 18 mánuðum,“ segir Pétur.
„Í pólitíkinni myndast oft svona stemmning fyrir breytingum en mér finnst það mikið ábyrgðarmál að flokkarnir standi við samgöngusáttmálann. Þetta snertir ekki bara Reykjavíkurborg heldur einnig nærliggjandi sveitarfélög og ríkið. Þau hafa greinilega samþykkt allt frá Sjálfstæðisflokknum.“
Kjósendur Sjálfstæðisflokks hafi viljað starfa með Miðflokki
Spurður hvort hann telji það klókt útspil hjá Hildi Björnsdóttur, verðandi borgarstjóra, að velja þessa flokka til samstarfs frekar en Miðflokkinn segist Pétur ekki alveg átta sig á því. Ljóst hafi verið að kjósendur Sjálfstæðisflokks hafi frekar viljað starfa með Miðflokki.
„Satt að segja átta ég mig ekki á því hvert pólitíska trixið bak við það að vinna með Viðreisn og Framsókn sé fremur en að vinna með Miðflokki. Það var vitað að kjósendur Sjálfstæðisflokksins vildu vinna með Miðflokki svo það verður áhugavert að sjá hvernig mun ganga þegar þessi meirihluti sýnir meira á spilin.“
„Ef ég á að vera alveg heiðarlegur þá er alveg himinn og haf milli okkar og Miðflokksins málefnalega. Við erum auðvitað opin fyrir góðu samstarfi við alla, en við í Samfylkingunni munum þó ekki víkja frá hugmyndafræði jafnaðarmennskunnar,“ segir Pétur.
Að lokum segir hann Reykjavík hafa verið í mikilli sókn undanfarin ár og að mikilvægt sé að uppbyggingu verði haldið áfram af sama krafti. Hann telur það áhyggjuefni muni meirihlutinn víkja frá áherslum jafnaðarmennsku í áframhaldandi uppbyggingu og því sé mikilvægt starf fram undan fyrir Samfylkinguna í stjórnarandstöðu.
