„Í svona málum er auðvitað verið að leggja mat á það hvaða áhrif samruni hefur á samkeppni. Þarna var um það tefla að einn af stóru þremur bönkunum hafði í hyggju að taka yfir langmest áberandi áskoranda þeirra, Kviku, sem hefur haft það yfirlýsta markmið að keppa við stóru bankana, “ segir Páll Gunnar Pálsson, forstjóri Samkeppniseftirlitsins, þegar hann ræddi um fyrirhugaðan samruna Kviku banka og Arion banka sem þessi fjármálafyrirtæki slógu út af borðinu vegna afstöðu Samkeppniseftirlitsins til hans eftir forviðræður.
Arion banki og Kvika gáfu það út um miðjan mánuðinn að ekkert yrði af fyrirhuguðum samruna bankanna tveggja. Bankarnir höfðu átt í forviðræðum við Samkeppniseftirlitið um þennan mögulega samruna. Samkvæmt tilkynningum frá bönkunum var ákveðið að hætta viðræðunum vegna afstöðu Samkeppniseftirlitsins til mögulegs samruna sem fram kom í forviðræðunum.
Páll Gunnar segir að kjarninn í forviðræðunum hafi snúist um það hvaða afleiðingar það myndi hafa ef Kvika myndi hverfa sem sjálfstæður banki á fjármálamarkaði. „Auðvitað snerust viðræðurnar um það hvaða áhrif það myndi hafa ef slíkur aðili færi af markaðnum og hvað kæmi mögulega í staðinn.“
Páll Gunnar og Samkeppniseftirlitið hafa hingað til ekki tjáð sig um það á hverju samruni Arion og Kviku strandaði. Rætt er við hann um forviðræðurnar um samrunann í fréttaskýringaþættinum Þetta helst í dag. Þáttinn má hlusta á hér:
Mikil samþjöppun hefði átt sér stað
Páll Gunnar segir í samtali við Þetta helst að athugunin á þessum fyrirhugaða samruna hefði leitt af sér talsvert mikla samþjöppun á fjármálamarkaði. „Í þessari athugun kemur skýrt í ljós að það hefði orðið talsvert mikil samþjöppun á einstaka sviðum eins og bíla- og tækjalánum, hlutabréfa- og skuldabréfamörkuðum, gjaldeyrismiðlun og fleiru. En ekki auðvitað síst, eins og ég nefndi áðan, að Kvika hefur þetta yfirlýsta markmið að keppa við stóru bankana, sýna þeim samkeppnislegt aðhald. Þess vegna vissu bankarnir fyrir fram að það yrði áskorun að fá það samþykkt, að slíkur aðili hyrfi út af markaðnum. Og út á það gengu viðræðurnar án þess að ég geti farið út í það í smáatriðum,“ segir Páll Gunnar.
Hann segir aðspurður að hann sé bundinn trúnaði um margt sem kom fram í viðræðunum, meðal annars um það hvaða mótvægisaðgerðir Arion og Kvika kynntu til að liðka til fyrir samrunanum. Slíkar mótvægisaðgerðir gætu falið í sér sölu eigna og annað slíkt sem gæti ýtt undir samþjöppun og fákeppni á fjármálamarkaði.
