Ný slökkviliðsstöð hefur verið opnuð á Laugarvatni og er mikil ánægja hjá slökkviliðsmönnum og heimafólki með nýju stöðina. Þrettán slökkviliðsmenn eru skráðir í slökkvilið staðarins en starfsemin er hluti af Brunavörnum Árnessýslu.
Nýja slökkviliðsstöðin var formlega vígð og tekin í notkun í vikunni en hún er staðsett rétt fyrir utan þorpið, rétt við Menntaskólann að Laugarvatni. Í tilefni tímamótanna buðu stjórn, stjórnendur og slökkviliðsmenn Brunavarna Árnessýslu íbúum og gestum að skoða stöðina.
„Þetta bara gjörbreytir allri aðstöðu fyrir slökkviliðsmennina okkar og vonandi koma bara fleiri inn í þetta og þetta eflir starfið og eykur viðbragðið. Til hamingju öll með þennan áfanga og svo eru áfangar, sem verða á næstu misserum. Það er verið að byggja stöð á Flúðum og það er farið að huga að stöð í Þorlákshöfn og það er verið að kaupa bíla hér og þar,” sagði Helgi Kjartansson, formaður stjórnar Brunavarna Árnessýslu, við vígslu hússins.
Það kom svo í hlut séra Kristínar Þórunnar, sóknarprests í Skálholti, að blessa nýju slökkviliðsstöðina.
„Og Guð blessi þetta hús, útgöngu okkar og inngöngu nú í dag og áfram, Amen.”
Varðstjórinn á Laugarvatni er alsæll með nýju slökkviliðsstöðina.
„Þetta er stórglæsilegt hús sem Brunavarnir Árnessýslu byggðu. Húsið er mikil lyftistöng fyrir Laugarvatn og mikil breyting frá gömlu stöðinni sem var í kjallaranum hérna á gamla pósthúsinu,” segir Eyjólfur Óli Jónsson, varðstjóri hjá slökkviliðinu á Laugarvatni.
Hvað eru þetta margir slökkviliðsmenn sem munu vinna á stöðinni?
„Við erum þrettán í augnablikinu og það eru þrír sem eru að ganga í gegnum nýliðanámið og eru að koma inn, koma inn með sumrinu,” segir Eyjólfur.
En nú eru það sinueldar sem Eyjólfur Óli hefur mestar áhyggjur af eins og eflaust allir aðrir slökkviliðsmenn landsins.
„Jú, nú fer sá varasami tími að ganga í garð þar sem við viljum endilega árétta að fólk passi sig hvernig það fer með eldinn og umhverfið í kring því umhverfið er eins og púðurtunna núna.”
