Mette Frederiksen forsætisráðherra Danmerkur segir heimsbyggðina alla og Bandaríkjamenn ekki síst þurfa að skilja að það sé Grænlendinga sjálfra að ákveða örlög sín og framtíð.
Fredriksen ítrekaði þetta í gær eftir að sjá mátti Grænland þakið bandarísku fánalitunum á korti sem Donald Trump Bandaríkjaforseti birti á samfélagsmiðlinum Truth Social Litirnir féllu einnig yfir Mið-Ameríku, Kanada og Ísland.
Mette Frederiksen var stödd á Grænlandi og sagði í samtali við danska ríkisútvarpið að heimastjórnin og Grænlendingar sjálfir hefðu ítrekað aftekið að gerast Bandaríkjamenn. Enginn skyldi velkjast í vafa um það, hvorki Bandaríkjamenn né aðrir.
Frederiksen klykkti loks út með að árétta að Grænland væri alls ekki til sölu. Í gær var gerður samningur milli Danmerkur, Grænlands og Evrópusambandsins um fjárfestingar sambandsins á Grænlandi að jafnvirði 56 milljarða íslenskra króna.
Þorgerður Katrín Gunnarsdóttir utanríkisráðherra kallaði Billy Long sendiherra Bandaríkjanna á sinn fund í gær og tjáði honum að færsla Trumps væri allsendis óviðeigandi.
