Öryggis- og varnarmál verða í brennidepli á Norðurlandaráðsþingi í vikunni. Þingmaður Sjálfstæðisflokksins sem sækir þingið segir áherslu verða lagða á að ríkin séu samstíga þegar komi að því að takast á við krísur sem upp kunni að koma.
78. þing ráðsins fer fram í Helsinki í vikunni þar sem Finnland fer með formennsku í ráðinu í ár. Fulltrúar Íslandsdeildar ráðsins sækja þingið. Þar á meðal er Bryndís Haraldsdóttir þingmaður Sjálfstæðisflokksins.
Ekki nógu samstíga í Covid
Hún segir öryggis- og varnarmál á Norðurlöndunum óneitanlega verða í brennidepli og hvernig best sé að stilla saman strengi í krísu. Það samstarf hafi ekki gengið nógu vel á tímum Covid samkvæmt nýrri skýrslu.
„Við höfum lagt mikla áherslu á það að vinna betur saman og samhæfa okkur þannig að þegar til næstu krísu kemur þá standi Norðurlöndin sterkari saman.“
Mikilvægt að raddir Grænlendinga og Færeyinga heyrist
Bryndís segir mörg mikilvæg mál á dagskrá en eitt vanti að hennar mati. Það sé endurskoðun Helsingforssáttmálans, sem unnið var að í formennskutíð Íslendinga árið 2024 þegar Bryndís var forseti ráðsins.
Þar hafi átt að taka afstöðu til fullrar aðildar Færeyja og Grænlands að norrænu samstarfi sem hafi verið hávær krafa af þeirra hálfu um árabil.
Hún hyggst spyrja um framvindu þess enda sé mikilvægt að hlusta á raddir þjóðanna tveggja, einkum Grænlands, í ljósi stöðu alþjóðamála í dag. Grænlendingar hafi ekki átt fulltrúa á þinginu undanfarin þrjú ár.
„Ég spurði Mette Frederiksen [forsætisráðherra Danmerkur] sérstaklega út í það í spurningatímanum síðast. Hún þakkaði fyrir þann stuðning sem við Íslendingar höfum veitt við þetta og hún var nú nokkuð skýr í því og hún vildi sjá Færeyinga og Grænlendinga verða fullgilda meðlimi Norðurlandaráðs.“
