Stjórn Símans hefur boðað til hluthafafundar 20. ágúst. Þar verður kosið um tillögu að nafnbreytingu félagsins. Verði hún samþykkt fær fyrirtækið nafnið Ásar hf.
Greint var frá þessum fyrirætlunum í febrúar þegar stjórn félagsins áformaði að sameina Símann, Greiðslumiðlun Íslands, Opin Kerfi og Öryggismiðstöð Íslands undir móðurfélaginu Ásum.
Einnig verður kosið um frekari breytingar á samþykktum félagsins, starfskjarastefnu og starfsreglum tilnefninganefndar.
„Breytingarnar tengjast í öllum tilvikum áður tilkynntri breytingu á skipulagi félagsins, sem felur m.a. í sér breytingu á nafni félagsins og framsali rekstrareigna til dótturfélags félagsins, Símans Rekstrar ehf,“ segir í tilkynningu Símans.
Nokkrar nafnabreytingar orðið á síðustu árum
Nokkuð hefur verið um nafnabreytingar skráðra félaga í Kauphöllinni á síðustu misserum. Í desember samþykkti stjórn Ölgerðarinnar að breyta nafni móðurfélags samstæðunnar. Það heitir núna Bera.
Fasteignafélagið Reginn fékk nafnið Heimar fyrir rúmlega tveimur árum. Skömmu áður fékk samstæða Vís, Fossa og Íslenskra verðbréfa nafnið Skagi.
