Að minnsta kosti þrettán týndu lífi í dag þegar þrýstiloftsknúinn rússneskur árásardróni skall á lestarpalli þar sem fjölmenni stóð í borginni Dnípró miðsvæðis í Úkraínu.
Volodymyr Zelensky forseti greindi frá árásinni á samfélagsmiðlum, segir hana skelfilega og að Rússar hafi vísvitandi beint drónanum að lestarpalli þar sem almennir borgarar voru við það að stíga um borð í járnbrautarlest.
Hann birti ljósmynd sem sýnir yfirskyggð lík liggja á skemmdum pallinum nærri brunnum lestarvögnum og sagði árásina sýna hve brýnt sé að Bandaríkin og Evrópuríki veiti aukið liðsinni til að bregðast við stigmögnun árása Rússa. Ríkislögreglan segir minnst tíu til viðbótar hafa særst í árásinni.
Rússar hafa gert drónaárásir á lestir víðs vegar um Úkraínu allt frá fyrstu dögum innrásarinnar sem hafa kostað líf nokkurra starfsmanna og eyðilagt nokkur hundruð dráttarvagna.
Úkraínska járnbrautarfélagið segir að í september einum hafi þurft að rýma hátt í sex þúsund lestir vegna yfirvofandi drónaárása Rússlandshers.
Zelensky hefur harðlega gagnrýnt samkomulag Donalds Trump Bandaríkjaforseta og Vladimírs Pútín Rússlandsforseta um að slaka á viðskiptaþvingunum í skiptum fyrir dísilolíu. Í stað slökunar ættu Bandaríkin, Evrópa og G7-ríkin að auka við refsiaðgerðir svo veikja megi stríðsvélar Rússlands.
