Hirti J. Guðmundssyni, einum mest áberandi andstæðingi ESB aðildar í aðdraganda þjóðaratkvæðagreiðslunnar í sumar, hefur verið sagt upp störfum á Hagstofu Íslands eftir tæp sjö ár. Hann segir skýringuna hafa verið aðhaldskröfu frá stjórnvöldum og að ítrekað hafi verið tekið fram að ekkert væri út á störf hans að setja.
Hannes Hólmsteinn Gissurarson, prófessor emeritus í stjórnmálafræði, er á öðru máli. „Ég er ekki í neinum vafa um, að þér var sagt upp vegna þinnar miklu og góðu baráttu gegn tillögunni um að hefja á ný aðildarviðræður að ESB,“ skrifar hann í athugasemd við færslu Hjartar á Facebook. Hannes færir engin gögn fyrir þeirri fullyrðingu.
Fékk ekki að kveðja
Hjörtur greindi frá uppsögninni á Facebook á fimmtudag, í færslu þar sem hann þakkar fyrrverandi samstarfsfólki fyrir samstarfið. Hann segir að sér hafi verið sagt upp fyrirvaralaust fyrir réttri viku og gert að hætta strax. Fyrir vikið hafi hann ekki getað kvatt aðra en eina samstarfskonu sem sat rétt hjá honum.
Hann segir uppsögnina hafa verið skell en ber vinnustaðnum vel söguna. „Mér þykir afar vænt um Hagstofuna og það góða fólk sem ég kynntist þar,“ skrifar Hjörtur, sem segist kjósa að líta á uppsögnina sem tækifæri. Hann nefnir Evrópumálin hvergi í færslunni.
Forsætisráðherra sagði Hagstofuna þurfa á öllum að halda
Hagstofan heyrir undir forsætisráðuneytið. Í fjárlögum ársins var gert ráð fyrir tíu milljóna króna hagræðingu hjá stofnuninni.
Fyrir rúmum þremur vikum sagði Kristrún Frostadóttir forsætisráðherra á Alþingi að starfsfólki Hagstofunnar hefði fækkað úr um 126 árið 2020 í 98, án þess að verkefnum hefði fækkað. Stofnunin „þarf einfaldlega á öllu að halda núna varðandi starfsfólk,“ sagði Kristrún í umræðu um frumvarp sem leggur niður rannsóknareiningu Hagstofunnar sem gert hefur þjóðhagsspár. Ekki hefur komið fram hvort fleirum hafi verið sagt upp hjá Hagstofunni.
Áberandi í Evrópuumræðunni
Hjörtur er sagnfræðingur og alþjóðastjórnmálafræðingur, fyrrverandi blaðamaður á Morgunblaðinu og rekur vefinn Stjórnmálin.is. Hann beitti sér af krafti fyrir nei-hliðinni fyrir þjóðaratkvæðagreiðsluna 29. ágúst, í greinum, á samfélagsmiðlum og í fjölda viðtala. Nei-hliðin hafði betur með 52,8 prósentum atkvæða gegn 47,2.
Hjörtur hefur áður lent í orðaskaki við ráðherra vegna skrifa sinna. Í fyrra sakaði Þorgerður Katrín Gunnarsdóttir utanríkisráðherra hann um að fá greitt fyrir pistlana á Stjórnmálin.is. Hann vísaði því á bug og sagðist aldrei hafa fengið krónu fyrir skrifin.
