Ivan Kaufmann, meirihlutaeigandi Vélfags, segir að íslensk stjórnvöld hafi komið í veg fyrir að hann gæti greitt laun starfsmanna fyrirtækisins úr eigin vasa þegar rekstur þess var kominn í verulegan vanda vegna viðskiptaþvingana.
Þetta kom fram í ítarlegu viðtali Kaufmanns við Frosta Logason á Brotkasti.
Vélfag, sem hafði starfað á Akureyri í rúmlega þrjá áratugi, varð fyrir miklu áfalli eftir að fyrirtækið lenti í viðskiptaþvingunum vegna meintra tengsla Kaufmanns við rússneska hagsmuni. Kaufmann hafnar þeim ásökunum alfarið.
Í viðtalinu segir hann að þegar ljóst hafi orðið að fyrirtækið væri að missa viðskipti og tekjur hafi hann lagt fram tillögu um að greiða laun starfsfólks og lögbundin gjöld úr eigin vasa þar til úr málum skærist.
„Ég bauðst til að greiða launin sjálfur af mínum eigin bankareikningi og einnig skattana sem fyrirtækið þurfti að greiða til íslenska ríkisins,“ segir Kaufmann.
Samkvæmt frásögn hans hafi utanríkisráðuneytið hins vegar hafnað því.
Kaufmann segir að honum hafi verið tjáð að slík greiðsla gæti talist stuðningur við stríðsrekstur Rússlands í Úkraínu.
„Mér var bannað að greiða laun, skatta og stéttarfélagsgjöld,“ segir hann.
Kaufmann: Þorgerður Katrín lét þau skilaboð berast að ég ætti að selja Vélfag Íslendingi
Segir 40 fjölskyldur hafa misst lífsviðurværi sitt
Kaufmann segist hafa komið til Akureyrar með áform um að efla fyrirtækið og byggja á þeirri vöruþróun sem þegar hefði átt sér stað innan Vélfags.
Hann lýsir fyrirtækinu sem „óslípuðum demanti“ með öfluga framtíðarmöguleika og segir að markmiðið hafi verið að stækka reksturinn og fjölga tækifærum.
Þess í stað hafi fyrirtækið að lokum farið í þrot og starfsfólk misst vinnuna.
„Fjörutíu fjölskyldur misstu tekjur sínar,“ segir hann.
Kaufmann segist enn finna fyrir sektarkennd vegna þess að honum hafi ekki tekist að standa við loforð sem hann gaf starfsfólki um að hann myndi bjarga fyrirtækinu.
„Ég sagði þeim að þau myndu ekki missa vinnuna. Ég gat ekki staðið við það loforð.“
Fékk aldrei fund með utanríkisráðherra
Í viðtalinu kemur einnig fram að Kaufmann hafi ítrekað óskað eftir fundi með Þorgerði Katrínu Gunnarsdóttur utanríkisráðherra.
Að hans sögn var slíkum fundi aldrei komið á.
„Ég óskaði eftir fundi nokkrum sinnum en fékk hann aldrei,“ segir Kaufmann.
Hann segir jafnframt að honum hafi aldrei verið gerð skýr grein fyrir hvaða gögn eða upplýsingar þyrfti að leggja fram til að hreinsa nafn sitt af þeim grunsemdum sem lágu til grundvallar aðgerðunum.
Stjórnarformaður Vélfags: Þorgerður Katrín sagði mér tvisvar að selja fyrirtækið Íslendingi
Segir mannorð sitt hafa verið eyðilagt
Kaufmann segir að ásakanir um tengsl við rússnesk stjórnvöld hafi haft víðtækar afleiðingar fyrir líf sitt.
Hann segist hafa misst viðskipti, samstarfsaðila, tryggingar og bankaviðskipti vegna málsins. Þá hafi fjölskylda hans einnig fundið fyrir afleiðingunum.
„Það er líf mitt fyrir Vélfag og líf mitt eftir Vélfag,“ segir hann.
Aðspurður um markmið sitt í dómsmálunum gegn íslenska ríkinu segir Kaufmann að það snúist fyrst og fremst um að endurheimta mannorð sitt.
„Ég vil fá líf mitt aftur. Ég vil sjá gögnin. Ég vil sjá sönnunargögnin.“
Aðalmeðferð í málum Vélfags og Kaufmanns gegn ríkinu er nú báðum lokið fyrir Hæstarétti og bíða málin nú dómsúrlausnar.
Hér fyrir neðan má finna stutt brot úr viðtali Frosta Logasonar við Ivan Kaufmann en til að sjá spjallið í heild sinni mælum við með áskrift á Brotkast.is
