Íbúar á stúdentagörðum hafa orðið varir við að utanaðkomandi aðilar geri sig heimakomna í almenningsrýmum garðanna, brjótist inn og jafnvel steli.
Vildís Harpa Sævarsdóttir býr á Skjólgörðum, stúdentagörðum í Brautarholti. Hún segist hafa orðið vör við að einhver búi inni á sameiginlegu salerni í stigagangi garðanna. Vildísi fór að gruna að einhver hefði komið sér fyrir inni á salerninu vegna þess að þar var nánast alltaf læst. „Fólk sem býr hérna notar ekki þetta klósett, það notar klósettin í íbúðinni sinni,“ segir Vildís.
Í þau fáu skipti sem salernið er ólæst segir Vildís oft vera fullt af drasli og öðrum hlutum þar inni, t.d. jakki, sígarettustubbar, flöskur og poki merktur apóteki.
Þar að auki segir Vildís að brotist hafi verið inn í geymslur á Skjólgarði og bíla í bílakjallaranum.
Heyrði hrotur úr salerninu
Hún ákvað loks að tilkynna grun sinn til Félagsstofnunar stúdenta þegar hún hafði heyrt hrotur úr læstu salerninu snemma morguns. Henni var sagt að málið yrði skoðað og að hún yrði látin vita með framhaldið.
Síðan þá hefur hún orðið vör við umgang á salerninu og spurði FS hvort búið væri að skoða málið. Svo var ekki en henni var sagt að heyra í lögreglu ef hún yrði vör við umgang aftur.
„Mér finnst þetta mjög óþægilegt,“ segir Vildís. „Ég veit af þessu á öðrum stúdentagörðum og veit að þar hefur ekkert verið gert.“
Vill ekki vera ástæða þess að einhver sofi úti
Hún segist eiga erfitt með að hringja á lögregluna vegna þess að hún vilji ekki vera ástæða þess að manneskja hafi ekki þak yfir höfuðið. Hún segir erfitt að vita hvernig hún eigi að snúa sér í málinu vegna þess að hún viti ekki í hvernig aðstæðum manneskjan sé. Hún vilji hvorki stofna henni né sjálfri sér í hættu.
„En ég vil vera örugg heima hjá mér.“
Hún segir vandamálið þó stærra en Félagsstofnun stúdenta. „Þó Félagsstofnun stúdenta sé ekki að gera nóg. Ef það væru myndavélar í alrýminu þá væri hægt að komast að því hver þetta er og vera með frekara öryggi. Eins þegar er brotist inn þá væri hægt að sjá hver braust inn og hægt að kæra það.
En eins og með þessi mál, það langar engan að sofa á almenningssalerni, þetta er einhver sem á ekkert betra. Þá er þetta náttúrulega borgin sem er ekki að halda utan um fólk sem á hvað minnst,” segir hún.
„Eins og í umsátri“
Hafsteinn Helgi Jóhannsson er nýfluttur af Gamla garði þar sem hann bjó í tvö ár. Þar hefur vandamálið verið hvað mest áberandi en Vísir greindi frá því í haust að þar hefði verið brotist inn ítrekað.
Hafsteinn segir að frá því að hann flutti inn hafi hlutir horfið úr sameiginlegu eldhúsi íbúa, smávegis úr mjólkurfernum, heilu smjörstykkin og kippur af áfengi svo dæmi séu nefnd. Í fyrstu hafi íbúar grunað hvern annan, hugsað að einhver hefði jafnvel tekið mat þeirra í misgripum, og því ekki kippt sér mikið upp við þetta í fyrstu.
Í haust fóru íbúar að taka eftir því að tveir menn héngu fyrir utan læstan inngang að byggingunni, drekkandi og reykjandi, og biðu eftir að einhver hleypti þeim inn. „Eins og í umsátri,“ segir Hafsteinn.
Þeir nýttu sér góðmennsku annarra
Hann segir íbúa oft hafa mætt ókunnum mönnum inni í sameiginlegum eldhúsum stúdentagarðanna. „Það eru allir háskólanemar svo næs og umburðarlyndir að það kippti sér enginn upp við þetta,“ segir hann. Í byggingunni búi í kringum 150 manns og margir sem staldri stutt við.
Íbúar hafi þar af leiðandi gert ráð fyrir að ókunnugt fólk í byggingunni væri kunningjar einhvers íbúa. Sama á við þegar mennirnir reyndu að komast inn í bygginguna. „Þeir voru alltaf að komast inn af góðmennsku annarra og nýttu sér það.”
Eina nóttina þegar Hafsteinn kom seint heim úr vinnunni sá hann mennina fyrir utan. Hann ákvað að fara krókaleið og inn um annan inngang. Þegar hann var kominn upp í rúm heyrði hann skarkala. Hann leit út um gluggann og sá annan mannanna troða sér inn um glugga á fyrstu hæð.
FS brást ekki við fyrr en eftir handtöku
„Sem betur fer hringdi einhver strax á lögregluna,“ segir Hafsteinn. „Þeir voru búnir að brjóta glugga á fyrstu hæð og koma sér inn.“ Lögreglumenn mættu fljótt á svæðið að sögn Hafsteins og handtóku mennina.
Hann segir Félagsstofnun stúdenta ekki hafa brugðist við áhyggjum íbúa fyrr en mennirnir voru handteknir. Myndavélar við innganginn hafi ekki skilað neinu og í langan tíma hafi verið ummerki um að fólk héldi sig til í kjallara byggingarinnar.
„Mér finnst FS hafa brugðist vel við þó að það hafi tekið tíma.“ Eftir handtökuna vöktuðu öryggisverðir bygginguna á kvöldin og nóttunni og nú eru sameiginleg rými læst.
„Ég var ekkert svo stressaður, ég hafði eiginlega gaman að þessu framan að,“ segir Hafsteinn en bætir við að hann sé líklega undantekning. Mörgum sem hann hafi búið með hafi ekki staðið á sama. „Sumar stelpurnar héldu sig bara inni í herbergi restina af önninni.“
Íbúar minntir á að gista ekki í sameiginlegum rýmum
Katrín Jónsdóttir býr á stúdentagörðum á Hótel Sögu. Hún segir mann hafa gist í sófa í sameiginlegu rými í byggingunni yfir heila helgi. Hún segir augljóst að maðurinn hafi ekki verið íbúi stúdentagarðanna.
Íbúar hafi reynt að ná sambandi við FS án árangurs. Eftir helgina hafi FS sent íbúum póst þar sem þeir voru minntir á að bannað væri að gista í sameiginlegum rýmum.
„Mér finnst skrýtið að snúa þessu þannig að við séum að gista þarna,“ segir Katrín. Henni hefði fundist eðlilegt að FS gæfi íbúum leiðbeiningar um hvað ætti að gera kæmi svona mál upp aftur.
Hún segir öryggi á Hótel Sögu þó nokkuð gott enda nýir stúdentagarðar. Erfitt sé að komast inn á garðana án lykils og hún telur utanaðkomandi koma með íbúum inn. „Maður hefur alveg oft verið með einhverjum í lyftu sem maður veit ekki hvort eigi heima þarna,“ segir hún. „Maður þorir kannski ekki að andmæla.“
