Icelandair hefur lagt fram kröfu um að meiðyrðamáli foreldra Sólons Guðmundssonar gegn flugfélaginu verði vísað frá dómi. Munnlegur málflutningur í tengslum við kröfuna fór fram í Héraðsdómi Reykjaness í dag. Þetta staðfestir Sævar Þór Jónsson, lögmaður Guðmundar Þórðarsonar og Rutar Ólafsdóttur, foreldra Sólons.
Sólon starfaði sem flugmaður hjá flugfélaginu í sex ár þar til skömmu áður en hann svipti sig lífi þann 25. ágúst 2024, örfáum dögum eftir að hann lét af störfum hjá fyrirtækinu í kjölfar ásakana samstarfskvenna sinna.
Gera sér grein fyrir baráttunni
Málið var þingfest í mars á þessu ári og Icelandair lagði fram kröfu um frávísun skömmu síðar. Foreldrar Sólons fara fram á að tvenn ummæli Icelandair um Sólon verði dæmd dauð og ómerk. Ummælin snérust um að Sólon væri hættulegur öryggi starfsfólks Icelandair samkvæmt frétt mbl.is í mars.
Sævar segir erfitt að segja til um hver niðurstaðan verði að svo stöddu en að foreldrar Sólons séu staðráðnir í að ná fram einhvers konar réttlæti í máli sonar síns. Margt sé enn á huldu um hvernig mál Sólons hafi verið tekið fyrir í fyrirtækinu.
„Umbjóðendur mínir gera sér alveg grein fyrir því að þetta er þannig mál að þetta er barátta.“
Kærður fyrir nauðgun eftir andlátið
Sólon lét af störfum hjá Icelandair þremur dögum fyrir andlát sitt, eftir að fyrirtækið tjáði honum um ásakanir samstarfskvenna í hans garð. Fjölskylda Sólons sagði honum ekki hafa verið tjáð um efni ásakananna og sögðu hann hafa verið neyddan til að segja upp.
Sjálfur hafi hann áður tilkynnt tvær samstarfskonur sínar fyrir einelti vegna einhliða frásagnar þeirra við samstarfsfólk um stutt samband hans við aðra þeirra. Icelandair hafi vísað þeirri kvörtun frá eftir að konan hafi sagst hafa orðið fyrir ofbeldi af hans hálfu.
Ein kona kærði Sólon fyrir nauðgun nokkrum dögum eftir andlát hans en lögmaður hennar sagði í yfirlýsingu að fjórar aðrar konur hefðu ásakað hann um líkamlegt og andlegt ofbeldi. Lögmaður þeirra Vilhjálmur Vilhjálmsson sagði ákvörðunina um að kæra Sólon hafa verið tekna fyrir andlátið í samtali við Vísi.
