Þrátt fyrir umræður um aflýsingar flugferða vegna óformlegra aðgerða flugmanna er það engu að síður svo að langstærstur hluti auglýstra flugferða hjá Icelandair skilar farþegum á áfangastað.
Þannig kemur fram í svari við fyrirspurn mbl.is til Icelandair að 98,3% af ferðum flugfélagsins hafa haldið af stað á áfangastað það sem af er maí, samanborið við 99% í fyrra og er munurinn því einungis 0,7%.
Stundvísi félagsins það sem af er maí er 80% samanborið við 84% í fyrra.
Mikið hefur verið skrifað og rætt um það að flugmenn Icelandair neiti að selja frídaga sína þegar upp koma veikindi flugmanna. Fram kom í máli stjórnenda Icelandair að þeir litu svo á að um óformlegar verkfallsaðgerðir væri að ræða.
„Þrátt fyrir að það hafi verið fyrirferðamiklar fréttir um það að mörgum ferðum sé aflýst þá er ekki um margar flugferðir að ræða í heildarsamhenginu. Farþegar þurfa því ekki að hafa miklar áhyggjur af því að ekki verði úr flugferðunum þeirra,“ segir Guðni Sigurðsson, upplýsingafulltrúi Icelandair.
Strangari kröfur um heilsufar
Þrátt fyrir það hefur vaktaskrá haldið þannig að þegar forföll verða vegna veikinda hafa flugmenn á bakvakt alla jafna stigið inn í. Hins vegar hafa komið upp tilvik þar sem sá fjöldi flugmanna sem er á bakvakt hefur klárast og í þeim tilvikum hefur ekki tekist að manna einhverjar flugferðir.
Engum sögum fer af því að flugmenn hafi í auknum mæli hringt sig inn veika frá því sem áður var sem hluti af einhvers konar aðgerðum, en hins vegar ber að taka með í reikninginn að auknar kröfur eru gerðar til heilsu flugmanna samanborið við starfsmenn á almennum vinnumarkaði áður en þeir taka við stjórn flugvélar.
Þurfa að meta sig með gagnrýnum hætti
Er þeim því gert að meta heilsufar sitt með gagnrýnum hætti áður en þeir koma til vinnu. Þannig þurfi þeir t.a.m. að meta hvort þeir séu með einkenni veikinda, glími við þreytu eða svefnskort eða áhrif lyfja eða áfengis. Þá þurfi þeir að meta hvort þeir þjáist af of mikilli streitu eða andlegu álagi.
