Úkraínska varnarmálaráðuneytið hefur rekið háttsettan liðsforingja eftir að ljósmyndir voru birtar á samfélagsmiðli af horuðum úkraínskum hermönnum sem höfðu verið á matar og drykkjar á víglínunni til lengri tíma í senn.
Fjölmiðillinn Guardian greinir frá því að upp komst um málið þegar eiginkona eins hermannsins, Anastasiia Silchuk, birti myndir af hermönnunum fjórum á samfélagsmiðlum. Mennirnir eru berir að ofan á myndunum og mjög horaðir og vannærðir.
Undanfarna átta mánuði hafa hermennirnir verið á víglínunni við ánna Oskil, nærri borginni Kupiansk í Norðaustur-Úkraínu, við afar erfiðar aðstæður. Matarsendingar voru óreglulegar og mest liðu 17 dagar án þess að þeir hefðu mat að borða. Þá söfnuðu þeir regnvatni og bræddu snjó til að drekka. Þeir margbáðu um vistir í talstöð en fengu engin svör.
Liðsforinginn sem bar ábyrgð á herdeildinni hefur verið rekinn en stórfylkið (e. brigade) viðurkenndi að það hefði verið erfitt að koma mat til herdeildarinnar því hún var svo nálægt víglínunni og hersveitum Rússa.
Vélmenni flytja vistir til hermanna í erfiðum aðstæðum
Ónafngreindur talsmaður úkraínska hersins sagði að Rússar fylgdust vel með allri hreyfingu og umferð að víglínunni með skotfæri, mat og eldsneyti. Hann segir að Rússar reyni að stöðva og skjóta niður eins mikið og þeir geta. Suma daga hafi þeir meiri áhuga á því að koma í veg fyrir flutning á mat og eldsneyti en hergögnum til hermanna á víglínunni.
Fyrir vikið er gríðarlega erfitt að flytja vistir til hermanna á víglínunni eða flytja mannskap þaðan burt án þess að stofna lífi fólks í hættu. Undanfarna mánuði hefur úkraínski herinn nýtt sér ómönnuð vélmenni til að senda vistir á svæði sem eru berskjölduð og til að sækja slasaða hermenn.
Fengu mat en ekki fluttir burt strax
Samkvæmt Silchuk hafði myndbirtingin áhrif. Nýr liðsforingi er kominn yfir herdeildina og hermennirnir hafa fengið sendan mat. Hún segir að hermennirnir neyti matarins þó sparlega. Magar þeirra hafa skroppið saman og þeir eiga erfitt með að treysta á hvenær næsta matarsending berst. Hún vill að mennirnir verði leystir af svo þeir komist undir læknishendur sem fyrst.
Samkvæmt yfirstjórn úkraínska hersins verður málið rannsakað og hermennirnir verða fluttir burt um leið og aðstæður skapast til þess.
