Hannes Valle Þorsteinsson hefur verið sakfelldur í Héraðsdómi Reykjavíkur fyrir kynferðisbrot gegn stúlku á leikskólanum Múlaborg en sýknaður af annari ákæru fyrir annað brot gegn sömu stúlku og einnig af ákæru fyrir brot gegn öðru barni.
Fjölmiðlar höfðu áður aðeins vitneskju um að Hannes hafi verið ákærður fyrir brot gegn einu barni en ekki tveimur.
Múlaborgarmálið: Hannes ákærður fyrir tvö brot gegn einu barni
Hannes var ákærður fyrir nauðgun og kynferðisbrot gegn barni, með því að hafa tvisvar sinnum á árinu 2025, þegar hann starfaði á Múlaborg, haft önnur kynferðismök en samræði við fyrrnefndnu stúlkuna en samkvæmt ákærunni misnotaði Hannes freklega yfirburðastöðu sína gagnvart stúlkunni, brást trausti hennar og trúnaði sem starfsmaður leikskólans og í annað skiptið, jafnframt notfært sér að þannig var ástatt um stúlkuna að hún gat ekki spornað við verknaðninum sökum svefndrunga.
Samkvæmt ákærunni dró hann í fyrra skiptið niður buxur stúlkunnar inni á salernisbás, tók hana upp
þannig að hún sneri baki í hann og sett getnaðarlim sinn á milli læra hennar og viðhafði samfarahreyfingar.
Síðara brotið átti sér stað í hvíldarherbergi þar sem stúlkan lá sofandi, en samkvæmt ákærunni kraup Hannes fyrir aftan hana, dró buxur hennar niður og setti getnaðarlim sinn á milli læra hennar og viðhafði samfarahreyfingar.
Hannes var einnig ákærður fyrir kynferðislega áreitni gegn öðru barni á leikskólanum með því að hafa bitið það í nokkur skipti í rassinn.
Hannes játaði fyrstnefnda brotið en neitaði sök í hinum tveimur ákæruliðunum.
Sakfelldur og sýknaður
Í niðurstöðu Héraðsdóms Reykjavíkur segir að Hannes hafi mótmælt því að í brotinu sem hann játaði hafi verið um að ræða önnur kynferðismök en samræði. Vildi hann meina að það hefði falið í sér kynferðislega áreitni. Hann hafi sett getnaðarlim sinn á milli læra stúlkunnar í örstutta stund og að snertingin hafi ekki verið mjög áköf. Þá hafi getnaðarlimur hans ekki snert kynfæri hennar.
Dómurinn segir hins vegar að sú háttsemi Hannesar að setja getnaðarlim sinn á milli læra stúlkunnar og viðhafa samfarahreyfingar sé ótvírætt önnur kynferðismök en samræði. Það hafi ekki þýðingu þótt háttsemin hafi varað stutta stund eða að getnaðarlimur Hannesar hafi ekki snert kynfæri stúlkunnar. Því verði að sakfella hann í samræmi við ákæru fyrir að hafa viðhaft önnur kynferðismök en samræði við stúlkuna.
Þegar kemur að síðara brotinu, í hvíldarherberginu, sem Hannes var ákærður fyrir en neitaði sök í segir héraðsdómur að hann hafi játað brotið í fyrstu yfirheyrslu en síðan dregið það til baka. Dómurinn segir að við yfirheyrsluna hafi ekki verið tekið tillit til misþroska og greindarskerðingar Hannesar og það sjáist vel af upptöku af yfirheyrslunni. Hann hafi verið beittur miklum þrýstingi af lögreglumönnum og umrædd játning hans og tilheyrandi lýsing á atvikinu sé ótrúverðug. Frásögn stúlkunnar af atvikinu sé ekki nægilega skýr og ekki dugi framburður annars starfsmanns heldur til sakfellingar. Því verði að sýkna Hannes af þessum ákærulið.
Önnur sýkna
Þegar kemur að ákæru fyrir kynferðislega áreitni gegn hinu barninu með því að bíta það í rassinn segir Héraðsdómur Reykjavíkur að Hannes hafi viðurkennt athæfið en telji það ekki refsivert.
Sagði hann um hafa verið að ræða leik þeirra á milli. Dómurinn segir engin nánari gögn liggja fyrir um hvar eða hvernig háttsemin átti sér stað. Svo virðist þó sem hún hafi átt sér stað í opnu rými þar sem bæði önnur börn og starfsfólk hafi verið viðstödd og Hannes hafi ekki leitast við að dylja háttsemina. Þá verði ráðið að barnið hafi verið í bleyju á þessum tíma. Verði því að leggja til grundvallar að Hannes hafi bitið eða nartað í rass brotaþola utan yfir klæðnað og bleyju.
Það sé ekkert sem bendi til að þetta háttalag Hannesar hafi verið kynferðislegs eðlis. Hann hafi talið sig vera að leika við barnið með þessu.
Sýkna verði hann því af ákæru um kynferðislega áreitni og einnig ákæru til vara um brot gegn barnaverndarlögum þar sem athæfið geti hvorki talist vera ruddalegt eða ósiðlegt athæfi í skilningi laga.
Fyrir brotið sem hann játaði og var sakfelldur fyrir þótti við hæfi að dæma Hannes í þriggja ára fangelsi, Gæsluvarðhald sem hann hefur sætt frá því í ágúst 2025 dregst frá dóminum.
Dóminn yfir Hannesi Valle í heild sinni er hægt að nálgast hér.
