Truflanir urðu um borð í flugvél breska flughersins þar sem John Healey, varnarmálaráðherra Bretlands, var á meðal farþega. GPS-kerfi vélarinnar var gert óvirkt þegar hún flaug nálægt rússnesku landamærunum í síðustu viku.
Þetta staðfesti varnarmálaráðuneytið í dag.
Dagblaðið The Times greindi fyrst frá því að merki þotu breska flughersins hefði verið truflað þegar Healey var á leið aftur til Bretlands á fimmtudag eftir að hafa heimsótt breska hermenn sem staðsettir eru í Eistlandi.
Breska varnarmálaráðuneytið staðfesti við AFP að fréttin væri rétt og bætti við: „Þetta eru óábyrgar truflanir af hálfu Rússa, en breski flugherinn er vel undirbúinn til að takast á við slíka starfsemi.“
Kerfið óvirkt í þrjá tíma
Ekki var staðfest hver stóð á bak við atvikið né hvort þota Healeys hafi verið skotmark af ásettu ráði.
Atvikið gerði GPS-kerfi flugvélarinnar óvirkt í þriggja klukkustunda fluginu og neyddi flugmennina til að nota önnur leiðsögukerfi, að því er dagblaðið greindi frá.
The Times, en fréttamaður þess var í fylgd með Healey, sagði að rafeindatæki hefðu ekki getað tengst internetinu og hlutar mælaborðsins hefðu bilað.
Þetta gerist eftir að varnarmálaráðuneytið sagði í síðustu viku að tvær rússneskar þotur hefðu „ítrekað og á hættulegan hátt“ stöðvað breska eftirlitsflugvél yfir Svartahafi í apríl.
