Formaður Öryrkjabandalags Íslands segir borgina ekki sinna lögbundnum skyldum sínum við fatlað fólk. ÖBÍ hefur höfðað mál gegn Reykjavíkurborg fyrir að fjármagna ekki samþykkta NPA-samninga.
Málið var þingfest í Héraðsdómi Reykjavíkur í gær. ÖBÍ telur borgina hafa brotið gegn lögum um þjónustu við fatlað fólk með langvarandi stuðningsþarfir. Ekki var gert ráð fyrir fjölgun NPA-samninga í fjárhagsáætlun Reykjavíkurborgar þrátt fyrir að 42 samþykktar umsóknir biðu fjármögnunar.
„Af einhverjum orsökum þá hefur Reykjavíkurborg ekki gert ráð fyrir því að fylgja þessum lögbundnu skyldum sínum,“ segir Alma Ýr Ingólfsdóttir formaður ÖBÍ.
Aðeins þriðjungur sveitarfélaga svaraði könnun
Bandalagið hafi ákveðið að höfða mál gegn borginni í kjölfar könnunar þess á þjónustu við fatlað fólk hjá sveitarfélögum landsins síðasta haust. Viðbrögðin hafi vægast sagt verið dræm en aðeins um einn þriðji sveitarfélaga svaraði ÖBÍ.
Af þeim svörum hafi mátt lesa að ekkert fólk væri á biðlista eftir NPA-þjónustu í þeim sveitarfélögum. ÖBÍ telji það ekki gefa rétta mynd. Svo virðist sem sum sveitarfélög veigri sér við því að upplýsa fólk um að þau eigi rétt á NPA-þjónustu. Eins og staðan er í dag standi þó ekki til að höfða mál gegn fleiri sveitarfélögum.
Hægt að veita fjármagn í allt annað
Alma segir fjárhagsáætlun Reykjavíkurborgar segja það sem segja þarf um viðhorf til fatlaðs fólks.
„Það er ekki orðið við þeirri þjónustu sem er þegar lögbundin og viðhorfið er náttúrulega mjög lélegt. Þarna er ekki verið að leggja kapp á að mæta þegar samþykktum samningum á meðan það er einhvern veginn hægt að gera aðgerðaáætlanir og veita fjármagn í allt annað.“
