Ungu fólki sem ferðast með einkabílnum hefur fjölgað á höfuðborgarsvæðinu síðustu ár, meðan þeim sem kjósa aðra ferðamáta fækkar. Fæstir íbúar höfuðborgarsvæðisins telja að lausnir samgöngusáttmála höfuðborgarsvæðisins breyti sínum ferðavenjum og enn færri að áætlanir hans standist. Þetta kemur fram í niðurstöðum Gallup-könnunar sem kynntar voru á ráðstefnu um samgöngumál á höfuðborgarsvæðinu í dag undir yfirskriftinni Greiðari leið – Hugmyndir óskast.
Konráð Guðjónsson hagfræðingur hjá Kontext kynnti niðurstöður hennar. 57% sögðust telja að lausnir samgöngusáttmálans myndu breyta litlu fyrir sínar ferðavenjur og 66% höfðu ekki trú á að áætlanir hans myndu standast. 19% höfðu mikla trú á að lausnir sáttmálans myndu breyta sínum ferðavenjum og 18% voru bjartsýnir á að áætlanir stæðust.
Ferðavenjukönnun sýndi að 75% íbúa höfuðborgarsvæðisins 2022 ferðuðust helst sem bílstjóri í einkabíl og 8% sem farþegi, svipað og undanfarin fimm ár. 7% kusu að fara fótgangandi, 5% á reiðhjóli og 3% með strætisvagni.
Þegar litið var til þess hvernig unga fólkið kom sér í og úr skóla sást að sífellt fleiri kusu að nota einkabíl en almenningssamgöngur eða aðra ferðamáta.
Nærri helmingur framhaldsskólanema ferðast helst sem bílstjóri í einkabíl og 17% sem farþegi. Hlutfall þeirra sem aka helst sjálfir hækkaði um 7% milli 2019 og 2022. Þeim sem notuðu strætó sem sinn helsta ferðamáta fækkaði á sama tíma úr 17% í 13%, reiðhjól úr 6% í 4% og fótgangandi fóru úr 21% í 16% á þessum þremur árum.
Daði Baldur Ottósson, samgönguverkfræðingur hjá Eflu, kynnti tillögur frá íbúum höfuðborgarsvæðisins að úrbótum. Þar voru ofarlega á blaði forgangur strætó í umferðinni, meiri fjarvinna, að fleiri verði samferða og að færri leggi af stað út í umferðina á saman tíma.
Í hverri viku frá 2019 hafi bílum fjölgað um 50, fólki um 80 og skráðum ökutækjum um 60. Á hverju heimili séu að meðaltali 1,6 bílar og 1,9 fullorðnir.
Daði sýndi hvernig ferðatími um fjölfarna leið, frá Hafnarfirði til Háskóla Íslands, myndi léttast ef litið yrði meira til slíkra lausna.
Ferðatími um þessa leið að morgni á virkum dögum lengist um rúmlega hálftíma á einni viku upp úr miðjum ágúst þegar framhalds- og háskólar hefja göngu sína – því skóladagurinn í þeim öllum hefst á sama tuttugu mínútna tímabili.
Umferð þyngist enn frekar þegar grunnskólarnir hefjast viku síðar og segir Daði að þá taki jafn langan tíma að hjóla sömu leið milli Hafnarfjarðar og Háskóla Íslands.
Uppfært: í fyrri frétt voru aðeins tilteknar niðurstöður feðravenjukönnunar í og úr skóla. Niðurstöðum fyrir ferðamáta fólks í og úr vinnu hefur verið bætt við.
